Gitifu uheruka gusubizwa mu kazi “yanditse asezera”

Umunyamabanga Nshingwabikorwa w’Umurenge wa Gatare witwa Nkurikiyimana Pierre washinjwaga ruswa y’igitsina mu minsi ishize, ariko ntibimuhame, birakekwa ko yandikiye Ubuyobozi bw’Akarere ka Nyamagabe asezera ku kazi.

Amakuru UMUSEKE wamenye avuga ko Gitifu Nkurikiyimana Pierre wari ukurikiranyweho ibyaha bitandukanye bishingiye kuri ruswa y’igitsina, agafungwa amezi abiri akaza kurekurwa, yandikiye Umuyobozi w’Akarere ka Nyamagabe Niyomwungeri Hildebrand asezera akazi.

Gusa abatanze amakuru bavuga ko gusezera ku kazi k’uyu Gitifu bitavuye ku bushake bwe, ahubwo ko yaba yasabwe kubikora.

Umwe muri abo bahaye UMUSEKE amakuru yagize ati: “Birakekwa ko hari Umuyobozi wo ku rwego rutari urw’Akarere wasabye Meya Niyomwungeri kubwira Gitifu Nkurikiyimana ko agomba kwandika asezera akazi.”

Uyu akavuga ko n’icyemezo cyo kumusubiza ku kazi Akarere kafashe kitari cyumvikanyweho n’abayobora Akarere bose kuko ngo cyafashwe na Meya Niyomwungeri ndetse n’umwe mu bamwungirije.

Amakuru avuga ko Nkurikiyimana Pierre yanditse ibaruwa asezera ku kazi ku wa Gatanu w’icyumweru gishize.

Gitifu Nkurikiyimana Pierre ubwo yari amaze gufungurwa yoherejwe kuyobora Umurenge wa Gatare, mbere y’uko afungwa akaba yari Umuyobozi w’Umurenge wa Musebeya.

Ubwo twakoraga iyi nkuru, twahamagaye Meya w’Akarere ka Nyamagabe, Niyomwungeri Hildebrand ntiyitaba, tumuha n’ubutumwa bugufi ntiyabusubiza.

Nyirubwite uvugwa mu nkuru na we twamuhamagaye ariko ntiyitaba telefoni.

Gitifu washinjwaga ruswa y’igitsina yasubijwe mu kazi

MUHIZI ELISÉE
UMUSEKE.RW/i Nyamagabe