Ubuyobozi bw’Akarere ka Kirehe bwatangaje ko bwamaze gushumbusha inka 25 n’intama icyenda (9) Mutarambirwa Patrice wagize ikibazo inkuba igakubita amatungo ye.
Mu mvura yaguye ku gicamunsi cyo ku Cyumweru tariki ya 3 Gicurasi, 2026 inkuba yakubise inka 15 n’intama 18 izisanze mu rwuri ruherereye mu Mudugudu wa Kacyiru, Akagari ka Bwiyerere, Umurenge wa Mpanga mu karere ka Kirehe zose zihita zipfa.
Umuyobozi w’Akarere wungirije Ushinzwe Ubukungu n’Iterambere mu Karere ka Kirehe, NZIRABATINYA Modeste, yabwiye UMUSEKE ko uyu muturage nta bwishingizi yari afite, ariko ubuyobozi bufatanyije n’abaturage bwamaze kumushumbusha inka 25 n’intama icyenda.
Ati “Icya mbere ubuyobozi bwagiyeyo turamwihanganisha, kumukomeza ariko no kumuremera. Hamwe n’abaturage twahise tumuremera inka 25 ariko uyu munsi abaturage baracyakomeza kumuremera.”
Nzirabatinya avuga ko ubuyobozi bukangurira abaturage kugana ubwishingizi bw’amatungo ngo kuko ibyago bitera bitateguye.
Ati “Nk’ubuyobozi ni ubukangurambaga ku bwishingizi bw’amatungo. Twari dusanzwe muri Mpanga twarakozeyo ubukangurambaga, ariko twateguye ko icyumweru gitaha tuzasubirayo kugira ngo dushishikarize abaturage bacu gushyira mu bwishingizi amatungo.”
Yakomeje ati “Hari ukuntu tubona byitabirwa n’abafite za nka dukunze kwita iz’inzungu, ariko izi nka z’inyarwanda ari na zo Parice yari afite ukabona ntibabyitabira cyane. Ariko na bo twumvikanye ko tubibashishikariza, tukabahuza n’ibigo by’ubwishingizi kugira ngo byihute.”
Ubuyobozi buvuga ko hari izindi nka yari yarashyize mu bwishingizi, ariko izakubiswe n’inkuba zitari mu bwishingizi.
UMUSEKE.RW
