Ikigo cy’Igihugu cy’Ibarurishamibare mu Rwanda cyatangaje ko ibiciro ku masoko yo mu Rwanda byiyongereyeho 17,2% muri Nzeri 2026, ugereranyije n’ukwezi kwa Nzeri 2025. Muri Kanama 2026 byari byiyongereyeho 15,7%.
Imibare yashyizwe hanze n’iki Kigo kuri uyu wa Gatandatu tariki ya 10 Ukwakira 2026, igaragaza ko muri Nzeri 2026 mu Mijyi, ibiciro byiyongereye bitewe ahanini n’ibiciro by’ibiribwa n’ibinyobwa bidasembuye byiyongereyeho 20,9%, ibiciro by’amazu, amazi, amashanyarazi, gazi n’ibindi bicanwa byiyongereyeho 18,3%, ibiciro by’ibijyanye n’ubwikorezi byiyongereyeho 22,4% n’ibiciro by’amafunguro n’icumbi byiyongereyeho 18,9%.
Ikigo cy’Ibarurishamibare kivuga ko ugereranyije na Nzeri 2026 na Kanama 2026, ibiciro byiyongereyeho 2,7%. Iri zamuka ryatewe ahanini n’ibiciro by’ibiribwa n’ibinyobwa bidasembuye byiyongereyeho 5,3%. Ugereranyije Nzeri 2026 na Nzeri 2025, ibiciro by’ibintu bitarimo ibiribwa n’ibikomoka ku ngufu byiyongereyeho 11,4%.
Muri Nzeri 2026, ibiciro mu byaro byiyongereyeho 22% ugereranyije na Nzeri 2025. Ibiciro mu kwezi kwa Kanama 2026 byari byiyongereyeho 16%.
Bimwe mu byatumye ibiciro byiyongera muri Nzeri 2026 ni ibiciro by’ibiribwa n’ibinyobwa bidasembuye byiyongereyeho 27%, ibiciro by’amazu, amazi, amashanyarazi, gazi n’ibindi bicanwa byiyongereyeho 19,7% n’ibiciro by’ibijyanye n’ubwikorezi byiyongereyeho 38,7%. Ugereranyije Nzeri 2026 na Kanama 2026, ibiciro byiyongereyeho 6,5%.
Iri zamuka ryatewe ahanini n’ibiciro by’ibiribwa n’ibinyobwa bidasembuye byiyongereyeho 10,6%.
Tariki ya 8 Ukwakira 2026, ubwo hatangazwaga imyanzuro yavuye mu Kanama gashinzwe Politiki y’Ifaranga n’Ubukungu muri Banki Nkuru y’u Rwanda, Soraya Hakuziyaremye uyobora Banki Nkuru y’u Rwanda, yijeje ko izamuka ry’ibiciro rishobora kugera ku mpuzandengo ya 13,9% mu 2026, bikaba biteaganyijwe ko rizagabanyuka mu mwaka utaha wa 2027 rikagera munsi ya 8% mu gihembwe cya kabiri cyawo.
MUGIRANEZA THIERRY/ UMUSEKE.RW
