Itsinda ry’abofisiye bo mu Ishuri Rikuru rya Gisirikare rya Zimbabwe bari mu Rwanda aho baje mu rugendo rugamije kwagura ubufatanye no kwiga uko rwabashije kubaka umutekano uhamye ndetse n’imiyoborere.
Ni urugendo rw’ibyumweru bibiri aho kuwa 28 Nyakanga 2026, iri tsinda ryasuye Minisiteri y’Ingabo n’Icyicaro Gikuru cy’Ingabo z’u Rwanda (RDF), ryakiriwe rinahabwa ikiganiro kirambuye n’Umuyobozi Mukuru ushinzwe Ubufatanye Mpuzamahanga mu bya Gisirikare akaba n’Umuvugizi w’Ingabo z’u Rwanda, Brig Gen Patrick Karuretwa.
Yabaganirije ku mavu n’amavuko n’urugendo rwo kwiyubaka kw’Ingabo z’u Rwanda.
Brig Gen Patrick Karuretwa yasobanuye urugendo RDF yanyuzemo iva ku ngabo z’urugamba rwo kubohora igihugu ikagera ku rwego rw’ingabo z’umwuga zigira uruhare mu iterambere ry’igihugu.
Yanagaragaje uruhare rwa RDF mu bikorwa byo kubungabunga amahoro hirya no hino muri Afurika ndetse n’uruhare rwayo mu guteza imbere ituze n’umutekano mu karere.
Umuyobozi w’iri tsinda akaba ari nawe ushinzwe amasomo mu Ishuri Rikuru rya Gisirikare rya Zimbabwe, Col Cosmore Kaondera, yashimiye ubuyobozi bw’u Rwanda ku ikaze bahawe, anashima uburyo igihugu cyiyemeje guteza imbere iterambere rirambye.
Yanashimye Ingabo z’u Rwanda ku ruhare rwazo mu bikorwa by’iterambere imbere mu gihugu no mu butumwa mpuzamahanga bwo kubungabunga amahoro, avuga ko ibyo bikorwa bigirira akamaro abaturage.
Aba basirikare kuwa mbere tariki ya 27 Nyakanga 2026, basuye Urwibutso rwa Jenoside rwa Kigali hamwe n’ Ingoro y’ amateka y’urugamba rwo kubohora igihugu aho bafashe umwanya wo kuzirikana amateka ya Jenoside yakorewe Abatutsi mu 1994 ndetse n’intambwe u Rwanda rwateye y’ubumwe, ubwiyunge, kubaka igihugu n’amahoro arambye.
Uru ruzinduko rwabafashije kurushaho gusobanukirwa akamaro ko kubungabunga amateka no kuvomamo amasomo afasha gukumira Jenoside no guteza imbere ubumwe bw’Abanyarwanda.
MOD
UMUSEKE.RW
