Intambara hagati y’ingabo za Leta ya Kongo n’abarwanyi ba FRN ya Joseph Kabila irakomeje muri Kivu y’epfo, aho abasaga 7 bo mu mutwe udasanzwe w’ingabo za Congo uzwi nka “Hiboux” bahasize ubuzima.
Abo basirikare biciwe mu gitero cya drones cyagabwe ku birindiro byabo biherereye mu gace ka Masango, muri Teritwari ya Mwenga, mu Ntara ya Kivu y’Amajyepfo.
Amakuru aturuka muri ako gace agaragaza ko icyo gitero cyagabwe ku birindiro by’uyu mutwe, kigahitana abo basirikare abandi barashwiragira.
Amashusho yakwirakwijwe ku mbuga nkoranyambaga agaragaza imirambo yabo basirikare bo mu mutwe wa “Hiboux”, iri ku musozi.
Muri ayo mashusho humvikanamo amajwi y’abasirikare barokotse icyo gitero, basaba ubuyobozi bwa FARDC kuboherereza izindi ngabo zo kubongerera imbaraga, bavuga ko bahanganye n’igitutu cy’umwanzi.
Iki gitero kibaye mu gihe imirwano hagati ya FRN n’ihuriro ry’ingabo za FARDC ikomeje gufata indi ntera mu bice bitandukanye by’Intara ya Kivu y’Amajyepfo.
Andi mashusho yashyizwe hanze agaragaza Jenerali Charles Sematama ari ku rugamba, mu gihe abarwanyi ba FRN bivugwa ko bigaruriye uduce turimo Kuwamabuge, Rugezi, Gihuha, Gipimo, Kabanju na Biziba.
Iyi mirwano yatumye abasirikare ba FARDC, ingabo z’u Burundi, abarwanyi ba FDLR n’aba Wazalendo, ndetse n’Abashinwa bakoraga ubucukuzi bw’amabuye y’agaciro muri ibyo bice, bahunga berekeza mu bice bya Milimba na Gasiro.
Intambara ikomeye muri Kivu y’Amajyepfo ikomeje gusakiranya ingabo za FRN ya Kabila n’ihuriro ry’ingabo za Leta rikomeje kwamburwa ibirindiro.
NDEKEZI JOHNSON / UMUSEKE.RW
