Inkongi ikomeye yongeye kwibasira agace ka Panzi kari mu Mujyi wa Bukavu muri Repubulika Iharanira Demokarasi ya Congo.
Ni inkongi yabaye mu gitondo cy’ejo kuwa Gatanu tariki ya 18 Nzeri 2026,ifata inzu zitandukanye ziri mu Murenge wa Kabungu mu gace ka Mulungu-Lungu nkuko ikinyamakuru groupe le sentielle kibitangaza.
Amashusho yasakaye ku mbuga nkoranyambaga agaragaza ikibatsi cy’umuriro mwishi uzamuka ku nzu ndetse n’imyotsi ipfupfunyuka mu nzu.
Ntabwo hatangajwe icyateye iyi nkongi n’umubare w’inzu zangiritse kubera iyi nkongi.
Iyi nkongi ibaye mu gihe Tariki ya 10 Nzeri 2026, kuri Avenue Kasheke 3 mu gace ka Buholo – Kasha, muri Komini ya Bagira, inzu zafashwe n’inkongi , aho izirenga 500 zakongotse mu gace abaturage bubakisha ahanini imbaho bagasakaza amabati.
Inyubako zibasiwe n’umuriro harimo amashuri abiri, ishuri ribanza rya Mogo n’iryitwa Furaha. Nta kintu na kimwe kigaragara cyasigaye mu bikoresho by’ishuri, byose byahindutse umuyonga.
Abanyeshuri bo muri aya mashuri batunguwe n’uyu muriro, mu gihe cy’akaduruvayo, bamwe bashaka gusohoka bakubiranwa n’umwotsi mwinshi, bicwa no kubura umwuka, abandi barakomereka kubera ubushye.
Abayobozi ba AFC/M23 bayobora ako gace bemeje ko hapfuye abantu 27 biganjemo abanyeshuri ndetse hangirika inzu zikabakaba 500.
UMUSEKE.RW
