Igisirikare cya Ethiopia cyigambye gukubita ahabaza abarwanyi bo mu mutwe witwaje intwaro wa TPLF kikicamo abagera kuri 272 abandi 260 bagakomeraka bikomeye ndetse Ingabo za Leta zikisubiza ibice byari bimaze iminsi mu bugenzuzi bw’aba barwanyi bo mu Ntara ya Tigray.
Ni bwo bwa mbere ubuyobozi mu Gihugu busohoye itangazo buvuga ko buri mu mirwano n’aba barwanyi bo mu mutwe witwaje intwaro wa TPLF ugenzura ibice byinshi byo mu Ntara ya Tigray.
Aba barwanyi bari bigambye ko bagabye ibitero bikomeye ku Ngabo za Leta ndetse bakigarurira n’ibibuga by’indege birimo Mekelle, Axum na Shire byo mu Ntara ya Tigray ndetse bakagura n’ibitero bikagera mu bice by’Amajyaruguru y’Igihugu mu Ntara ya Afar na Amhara.
Aba barwanyi bavuga ko ibitero bari kugaba bigamije kwirengera no gusubiza ibyo bagabwaho n’ingabo za Leta.
Ku rundi ruhande Ingabo za Ethiopia zasohoye itangazo zivuga ko zagabye ibitero byo gusubiza ndetse ko byatanze umusaruro kuko byahitanye abarwanyi bagera kuri 272 abandi 260 bagakomeraka bikomeye ndetse zikisubiza ibice byo muri Amhara hahana imbibe na Tigray.
Abarwanyi bo muri TPLF baherutse kunga ubumwe n’indi mitwe itandatu bavuga ko bashaka guhirika ubutegetsi bwa Minisitiri w’Intebe, Abiy Ahmed.
Aba bo muri TPLF ni abayoboke n’abarwanyi b’ishyaka ryayoboye Ethiopia kuva mu 1991 kugeza mu 2018, ariko ubwo Dr, Abiy Ahmed yajyaga ku butegetsi bahise batangiza intambara yo kumurwanya ndetse yaje gukara hagati ya 2020 na 2022, irangira hasinywe amasezerano y’ubwumvikane nyuma y’uko hapfuye abantu 600,000.
Muri Mata 2026, ubuyobozi bwa TPLF bwongeye kwigomeka ndetse busubizaho inteko y’ubuyobozi yabwo mu mugambi Leta ifata nko gushaka kwigomeka no kwigenzura ngo hashingwe igihugu gishya.
