Amasoko n’inyubako z’ubucuruzi mu Burundi bikomeje kwibasirwa n’inkongi z’umuriro. Mu gitondo cyo kuri uyu wa kabiri tariki ya 25 Kanama 2026, Isoko rya Kinindo riherereye mu mujyi wa Bujumbura ryafashwe n’inkongi y’umuriro.
Amashusho yasakaye ku mbuga nkoranyambaga yerekanye iri soko rigurumana, ikirere cyuzuye umwotsi w’umukara. Abacuruzi bageragezaga kuramira bimwe mu bicuruzwa ariko umuriro ukaba mwinshi.
Nta cyumweru cyari gishize mu Burundi hahiye inyubako zikomeye z’ubucuruzi.
Ku wa Gatatnu tariki 21 Kanama 2026, Gallerie Ndayizamba na Le Parisien ni zimwe mu nyubako z’ubucuruzi zikomeye mu Mujyi wa Bujumbura zafashwe n’inkongi z’umuriro zirashya zirakongoka n’ibyari bizirimo.
Muri uyu mwaka wa 2026 mu Burundi hahiye inyubako nyinshi n’amasoko ariko igitera izo nkongi z’umuriro ntikimenyekane.
Muri Nyakanga 2026 , isoko rikuru rya Ngozi ryafashwe n’umuriro. Muri Kamena 2026, na none isoko ryacururizwagamo imbaho n’ibiti ryo mu gace ka Jabe mu Mujyi wa Bujumbura ryarahiye.
Muri Gicurasi, inkongi z’umuriro zatwitse amasoko yo mu Rugombo no mu Kinama i Bujumbura, zangiza byinshi.
Muri Mutarama 2026 na bwo, umuriro watwitse ahacururizwaga ibiti mu Mujyi wa Bujumbura, hafi y’isoko rizwi nko kwa Siyoni.
Muri Werurwe 2026 nabwo ububiko bw’intwaro i Bujumbura bwarahiye intwaro nyinshi zirangirika.
Révérien Ndikuriyo, Umunyamabanga Mukuru w’Ishyaka CNDD-FDD riri ku butegetsi mu Burundi aherutse kubwira abanyamakuru ko hari gukorwa iperereza ryimbitse hakamenyekana igitera inyubako gushya niba hari abantu babiri inyuma cyangwa niba ari impanuka zisanzwe.
UMUSEKE.RW
