Patrick Among ushinzwe ubuzima rusange muri Minisiteri y’ubuzima muri Kenya, yatangaje ko mu bantu 38 bapimwe kuwa Gatandatu italiki 17, Ukwakira, 2026 basanze umwe muri bo yaranduye Ebola, bituma umubare w’abayanduye uba umunani.
Ni umugabo w’imyaka 49 ukora imirimo itari ukwita ku barwayi. Among akemeza ko bamusanganye umuriro udasanzwe, kubabara umutwe no kuribwa ingingo.
Umurwayi wabonetse, yari asanzwe akora muri resitora ashinzwe koza ibyombo, bigakekwa ko yaba hari aho yahuriye n’umuntu wa mbere wagaragayeho Ebola muri Kenya mu ntangiriro z’Ukwakira.
Uwagaragayeho Ebola bwa mbere yari umugabo wari umaze igihe avuye muri Repubulika ya Demukarasi ya Congo, agera muri Kenya aciye muri Uganda.
Tariki 05 Ukwakira, 2026 nibwo uwo muntu yagaragaye muri Kenya, biba inkuru ikomeye mu Karere iki gihugu giherereyemo, byandikwa no mu itangazamakuru mpuzamahanga kubera ko Kenya ari igihugu gikomeye mu bukerarugendo muri Afurika.
The Citizen Kenya ivuga ko ubutegetsi bwa Kenya buri gukora ibishoboka ngo burinde ko ubwandu bukwira henshi.
Ku rundi ruhande, muri Repubulika ya Demukarasi ya Congo ho icyo cyorezo cyageze mu Ntara umunani, iheruka ikaba ari Ubangi Nord.
Dr. Jean Kaseya uyobora Ikigo nyafurika gishinzwe kurwanya ibyorezo, Africa CDC, aherutse kuvuga ko hari miliyoni $700 zari zigenewe ibikorwa byo kurwanya Ebola zahawe inzego z’ubuzima muri DRC ariko zirarigiswa.
Muri miliyari $1 yari yatanzwe, hakoreshejwe miliyoni $200 gusa.
UMUSEKE.RW
