Muhanga: Hatangiye kubakwa uruganda rw’amazi

Imirimo yo kubaka uruganda rw'amazi irasa n'iyamaze gutangira

Imirimo yo kubaka uruganda rw’amazi ruzwi nka “Kagaga Water Supply System” ruzatanga metero kibe zirenga 12,000 ku munsi yatangiye mu karere ka Muhanga.

Urwo ruganda rw’amazi rugiye kubakwa mu Mudugudu wa Murama, Akagari ka Remera, Umurenge wa Muhanga.

Imirimo yo kurwubaka yabanjirijwe no kwimura bamwe mu baturage bahaturiye, kubaka inzu abakozi bacumbikamo no  gutunganya ahazajya urugomero rw’amazi aturuka mu mugezi wa Kagaga agahura n’aturuka mu wa Makurungwe.

Ayo mazi yose amena mu mugezi mugari wa Bakokwe,  ni yo azajya muri uru ruganda rw’amazi.

Eng Dr Bagaragaza Romuald ukora muri Kampani y’Abashinwa yatsindiye isoko ryo gukora iyo mirimo, yabwiye UMUSEKE ko uruganda rw’amazi bagiye kubaka ruzatanga metero kibe zirenga 12,000 ku munsi.

Ati: “Imirimo yo kubaka uruganda rutunganya amazi nirangira duteganya kubaka ikigega kinini cy’amazi kizayakwirakwiza mu Mirenge itandukanye y’Umujyi wa Muhanga, ndetse n’indi 4 y’Akarere ka Kamonyi.”

Dr Bagaragaza yongeraho ko usibye ikigega bateganya kubaka, bafite ibikoresho bizifashishwa kongera ingano y’amazi akaba menshi mu miyoboro isanzwe WASAC yashyizeho.

Mujawamariya Médiatrice, umwe mu baturage avuga ko babariwe imitungo yabo bahafite bakaba bategereje kubona ingurane kugira ngo bimuke.

Ati: “Icyifuzo cyacu ni uko WASAC iduha ingurane kugira ngo twimuke vuba.”

Mujawamariya avuga ko uko amafaranga y’ingurane akomeza gutinda bidindiza ibikorwa byabo by’ubuhinzi.

Iyakaremye Libératha avuga ko bishimira iki gikorwa remezo kuko abatari bafite amazi n’abavomaga mu kabande bagiye kuyabona hafi.

Ati: “Twavomaga mu nkengero z’ahagiye kubakwa uruganda, ubu noneho barayatwegereje.”

Meya w’Akarere ka Muhanga, Kayitare Jacqueline avuga ko uruganda rw’amazi ruziye igihe, kuko ubusanzwe Umujyi wa Muhanga umaze gukura, kandi ukaba utajyana n’ubwiyongere bw’abawutuye.

Ati: “Umushinga ww’Akagaga tuwutegerejeho igisubizo cy’amazi akenewe cyane ku baturage bo mu Mujyi no mu bice biwukikije.”

Yakomeje agira ati: “Twifuza ko kubarira abaturage imitungo yabo bikorwa mu bushishozi, kugira ngo hatabaho kwibeshya hakagira abarengana cyangwa bagahabwa ingurane itajyanye n’imitungo bahafite.”

Kayitare akavuga ko bafite umugenagaciro wa Leta uzabara ibikorwa bijyanye n’imitungo y’abaturage, akabishyikiriza Inama Njyanama y’Akarere ikabyemeza.

Gusa nubwo bimeze bityo hari bamwe mu baturage bamaze guhabwa ingurane y’imitungo yabo bari bahafite, bamwe bakaba barangije kubaka inzu zo kubamo, abandi bakavuga ko batangiye imishinga y’ubucukuzi n’ubworozi bakesha amafaranga bahawe.

Imirimo yo kubaka uruganda rw’amazi rwa Kagaga izarangira itwaye arenga miliyari 20Frw, bikaba biteganyijwe ko rushobora kuba rutanga amazi mu mwaka wa 2030.

Isoko y’imigezi bazafatiraho amazi
Meya w’Akarere ka Muhanga, Kayitare Jacqueline
Abenjeniyeri bahawe Isoko ryo kubaka Uruganda rutunganya amazi rw’Akagaga
Abaturage bamwe babariwe igenagaciro ry’imitungo barishyurwa abandi bategereje amafaranga

MUHIZI ELISÉE
UMUSEKE.RW/Muhanga

Share This Article