Perezida wa Uganda, Yoweri Museveni, yagaragaje umuhungu we, Gen Muhoozi Kainerugaba usanzwe ari Umugaba Mukuru w’Ingabo za Uganda (UPDF) nk’ushobora kuzamusimbura ku butegetsi.
Ibi Perezida Museveni yabigaragarije mu biganiro yagiranye n’abayobozi bakuru b’ishyaka rye, National Resistance Movement (NRM), byabereye mu nama ya Komite Nyobozi Nkuru ya NRM (CEC) yabereye i Entebbe ku wa 27 Ukwakira 2026, nk’uko ibitangazamakuru byo muri Uganda, birimo ChimpReports na Nile Post, byabitangaje.
ChimpReports yatangaje ko Museveni yagejeje ku bitabiriye inama icyifuzo kijyanye n’uko umuhungu we, Gen Muhoozi Kainerugaba, ashobora kuzamusimbura ku butegetsi .
Iki kinyamakuru kivuga ko ‘Muri iyo nama, Museveni yanavuze ku butumwa umuhungu we akunze gutangaza ku rubuga rwa X, bumwe bukaba butavugwaho rumwe haba imbere muri Uganda no hanze yaho.’
Museveni yasubije ko “Ku giti cyanjye nta kibazo mfite ku byo yandika”.
Museveni kandi ngo yagaragaje Gen. Muhoozi nk’umuntu ukunda igihugu, uharanira ubumwe bw’Afurika kandi urwanya ruswa, anamushimira uruhare rwe mu guteza imbere ubushobozi bw’ingabo za Uganda n’inzego z’umutekano.
Mu byo Perezida Museveni yashimye harimo uruhare rwa Gen. Muhoozi mu kubaka no kongerera ubushobozi umutwe w’ingabo zidasanzwe, ndetse n’ibikorwa by’igisirikare cya Uganda byo kurwanya imitwe yitwaje intwaro mu Majyaruguru y’igihugu no mu Burasirazuba bwa Repubulika Iharanira Demokarasi ya Congo (RDC).
ChimpReports yatangaje ko igitekerezo cyo gushyigikira Muhoozi cyakiriwe neza na bamwe mu bayobozi ba NRM, barimo Haruna Kasolo, Visi Perezida w’ishyaka mu Karere ka Buganda akaba n’Umunyamabanga wa Leta ushinzwe Ubutwererane bw’Akarere, na Dr Tanga Odoi uyobora Komisiyo y’Amatora y’ishyaka.
Bivugwa ko hari bamwe bateruye ko bashyigikiye ko Muhoozi yazaba atwaye ishyaka rya NRM nka Kandida Perezida mu matora yo mu 2031, aba bakabamo Hadijah Namyalo, uyobora Ibiro bya Perezida wa NRM, na Anita Among, wigeze kuba Perezida w’Inteko Ishinga Amategeko ya Uganda, utarigeze utanga igitekerezo na kimwe muri iyo nama.
Ibi bije mu gihe abashyigikiye Gen Muhoozi bibumbiye mu ihuriro rya Patriotic League of Uganda (PLU) bamaze igihe mu bukangurambaga bugamije gushaka abazashyigikira Gen. Muhoozi mu matora ya Perezida ateganyijwe mu 2031.
Uyu uyu Mu-Jenerali w’inyenyeri enye usanzwe ari Umugaba Mukuru w’Ingabo za Uganda akaba n’Umujyanama wa Perezida mu bikorwa bya Gisirikare byihariye, mu butumwa akunda kwandika ku rubuga rwa X nawe akunze kwigaragaza nk’uziyamamaza mu 2031 ashaka intebe iruta izindi mu Gihugu cyiyobowe na se kuva mu 1986.
MUGIRANEZA THIERRY/ UMUSEKE.RW
