Mu nama nyunguranabitekerezo ku iterambere ry’Akarere ka Rusizi, mu byagaragajwe byagezweho mu myaka itanu ishize, harimo ibikorwaremezo birimo ibyumba by’amashuri byubatswe byatumye ibipimo by’uburezi bizamuka.
Iyi nama yabaye ku wa Gatatu tariki ya 26 Kanama, 2026.
Imibare itangwa n’ubuyobozi bw’akerere ka Rusizi, igaragaza ko hubatswe ibyumba 73 n’ubwiherero 66.
Sindayiheba Phanuel, Umuyobozi w’akarere ka Rusizi, yatangaje ko mu rwego rwo gukomeza gutanga uburezi bufite ireme, no kugabanya ubucucike mu mashuri, muri uyu mwaka w’amahuri 2026-2027 hari ibindi byumba by’amashuri bizubakwa.
Ati “Ibyumba by’amashuri byubatswe duhereye ku ngano y’ibyari bikenewe n’ingengo y’imari twari dufite. No muri uyu mwaka turateganya kubaka ibindi 38.”
Imibare igaragaza ko mu mwaka w’amashuri 2021-222 ibizamini bisoza amashuri abanza byakozwe n’abanyeshuri 7.254, hatsinda abanyehuri 5.948, bangana na 82%.
Mu cyiciro rusange hakoze abanyeshuri 4.859 hatsinda 3.314, bangana na 68%. Mu cyiciro gisoza amashuri yisumbuye hakoze abanyeshuri 2.149, hatsinda 1.793 bangana na 83.5%.
Mu mwaka w’amashuri 2024/2025 ibizamini bisoza amashuri abanza byakozwe n’abanyeshuri 7.605, hatsinda 6.535, bangana na 85.9%; mu cyiciro rusange hakoze abanyeshuri 4.936, hatsinda 3.480, bangana na 70.5%.
Mu cyiciro gisoza amashuri yisumbuye ikizamini cyakozwe n’abanyeshuri 2.170, hatsinda 1.909 bangana na 87.9%.
MUHIRE Donaten
UMUSEKE.RW/RUSIZI
