Umuhanzi w’indirimbo zo kuramya no guhimbaza Imana, Richard Mus, yashyize hanze indirimbo nshya yise ‘Yampagazeho’, avuga ko ari ubuhamya bw’urukundo n’uburinzi Imana yamugaragarije mu bihe bitandukanye by’ubuzima bwe.
Richard Mus avuga ko ubutumwa bw’iyi ndirimbo bushingiye ku kwizera Imana no kuyiringira mu bihe bikomeye, ashingiye ku byo avuga ko yiboneye mu buzima bwe.
Yagize ati “Yampagazeho’ bisobanuye uburinzi bw’Imana buhamye, butagira icyabuhindura na gito. Nifuza gushishikariza abanyumva bose ko bakwiringira Imana mu ngorane zose baba banyuramo, kuko ifite igisubizo cya buri kibazo.”
Uyu muhanzi avuga ko yifuza ko umuntu wumva iyi ndirimbo ayivamo atekereje ku rukundo rw’Imana ndetse n’uburyo kwizera bishobora gutanga ihumure mu bihe by’ibigeragezo.
Ati “Umuntu ucyumva iyi ndirimbo nifuza ko arangiza kuyumva atangarira Imana, akamenya ko igira uburinzi buhambaye bwo kwita ku bantu bayo.”
Richard Mus avuga ko ubutumwa buri muri ‘Yampagazeho’ bufitanye isano n’ubuzima bwe bwite, kuko ibyo yaririmbye ari ibintu avuga ko yanyuzemo kuva akiri umwana kugeza mu busore.
Ati “Nanjye ubwanjye ibyo naririmbye ndabizi neza, nabibayemo. Ndi muto no mu busore, Imana yanyeretse urukundo rukomeye. Nabashije gukura, ndashaka mba umugabo kandi nari imfubyi. Imana yampagazeho.”
Richard Mus avuga ko mu rugendo rwe rwa muzika agenda abona impinduka, cyane cyane mu micurangire no mu buryo bwo kuririmba. Yongeraho ko abantu bamukurikirana na bo bamubwira ko hari aho ibikorwa bye bigenda bitera imbere.
Ati “Bitandukaniye ku micurangire no ku buryo bwo kuririmba, abantu bambwira ko bigenda bikura. Urebye nta kidasanzwe cyatubayeho, gusa birumvikana ko tugenda dukura kandi tuzagerageza kurushaho kunoza ibyo dukora.”
Uyu muhanzi avuga ko yifuza ko ubutumwa buri muri ‘Yampagazeho’ bugera ku bantu banyura mu bihe bikomeye, bukabafasha gukomeza kugira icyizere no kwihangana.
Ati “Ndifuza ko ‘Yampagazeho’ yaba indirimbo nini mu ruhando rwa muzika mu Rwanda n’ahandi hose. Ndifuza ko yasiga izina ryanjye mu mitima y’abakunzi b’umuziki wo kuramya no guhimbaza Imana ndetse n’umuziki muri rusange.”
Richard Mus kandi yatangaje ko ari gukora kuri album nshya, avuga ko izagenda igaragaramo izindi ndirimbo kandi ko izashyirwa hanze igihe izaba imaze gutunganywa.
Nyura hano urebe indirimbo ‘Yampagazeho’ ya Richard Mus:
