Volleyball: Police na REG zegukanye Kirehe Open 2026

Ikipe ya REG VC na Police WVC, ni zo zegukanye irushanwa rya ‘Kirehe Open Volleyball Tournament 2026’ ryaberega mu Karere ka Kirehe mu Ntara y’i Burasirazuba.

Ni irushanwa ryatangiye ku wa Gatanu, tariki ya 2 Ukwakira 2026, risozwa ku Cyumweru, tariki ya 4 Ukwakira 2026.

Ryateguwe biciye mu bufatanye bw’Akarere ka Kirehe n’Ishyirahamwe ry’Umukino wa Volleyball mu Rwanda [FRVB], hagamijwe gufasha amakipe kongera umubare w’amarushanwa.

Mu cyiciro cy’abagore, hari hitabiriye amakipe atatu arimo RRA WVC, Police WVC na RP-Kigali WVC. Mu cyiciro cy’abagabo, hitabiriye amakipe atandatu arimo EAUR VC, REG VC, Police VC, Gisagara VC, Kirehe VC na APR VC.

Police WVC mu cyiciro cy’abagore, ni yo yegukanye igikombe nyuma yo gutsinda RRA WVC amaseti 3-0 [25-22, 25-18 na 25-16]. Mu cyiciro cy’abagabo, REG VC yegukanye igikombe nyuma yo gutsinda APR VC amaseti 3-2.

Mu guhatanira umwanya wa Gatatu, Kirehe VC yatsinze Police VC amaseti 3-1 [19-25, 31-29, 25-23 na 25-21].

Irushanwa rya ‘Kirehe Open Volleyball Tournament’, risanzwe ari ngarukamwaka, ryakinwaga ku nshuro yaryo ya kane.

Police WVC ni yo yegukanye iri rushanwa mu cyiciro cy’abagore
Nyuma yo gutsinda RRA WVC amaseti 3-0
REG VC ni yo yegukanye igikombe mu cyiciro cy’abagabo
Umukino w’abagore wongeye kugaragaza urwego rwo hejuru, Volleyball y’u Rwanda iriho
Ni umukino utagoye Police WVC

UMUSEKE.RW

Share This Article