Mu rwambariro rw’ikipe ya Musanze FC, hakomeje kuvugwamo kudahuriza hamwe ku mukino w’umunsi wa 28 wa shampiyona iyi kipe izakirira Kiyovu Sports kuri Stade Ubworoherane.
Habanje gucaracara amakuru ku mbuga nkoranyambaga, avuga ko ubuyobozi bw’iyi kipe bushobora kuba bwamaze gutumbagiza agahimbazamusyi k’abakinnyi kugira ngo bazatsinde uyu mukino.
Andi makuru aturuka mu rwambariro rw’iyi kipe yo mu Majyaruguru, avuga ko abakinnyi ndetse n’abatoza bari gukekana ko hari ababa baganirijwe n’ikipe zifite inyungu mu bizava muri uyu mukino.
Uku gukekana hagati ya bo, gushobora no kugera ku mutoza wa yo mukuru, Ahmed Adel ushobora kutazatoza uyu mukino kubera kugira ibyo atumvikanaho n’ubuyobozi bwe nk’uko amakuru ava i Musanze abivuga.
Musanze FC izakira Kiyovu Sports ku Cyumweru tariki 7 Gicurasi 2023, kuri Stade Ubworoherane Saa cyenda z’amanywa.
Mu gihe Urucaca rwatsinda uyu mukino, rwaba ruri kwiyongerera amahirwe yo kwegukana igikombe cy’uyu mwaka.
UMUSEKE.RW