Miss Rwanda 2022 Muheto Nshuti Divine yikomye abamwihaye ku mbuga nkoranyambaga bavuga ko amashusho ye yagaragaye ari kubyina mu bukwe yari yasinze.
Ayo mashusho yafashwe ubwo yari yatashye ubukwe bwa Sebihogo Kazeneza Merci wanyuze muri Miss Rwanda ya 2022 wasabwe na Rukundo Nkota Elysée.
Muri ubwo bukwe bwitabiriwe n’abakobwa benshi banyuze muri Miss Rwanda nibwo hafashwe amashusho ya Muheto ari kubyina kubera ibyishimo. Iyo video yahise isakara ku mbuga nkoranyambaga bamwe bavuga ko uyu mukobwa yari yasinze.
Uwiyita Yemi Nyamirambo kuri twitter yanditse avuga ngo “Umukobwa nkuyu usinda mu bukwe abifata nk’ibendera ritukura.”
Muheto yahise amusubiza ari guhakana ibyo bamushinjaga avuga ko batazi gutandukanya umusinzi n’umuntu wishimye.
Ati “Birababaje kuba witiranya kwishima no gusinda! Wari umunsi w’ibyishimo kandi twarishimye rwose! Ahubwo twese twamenye gahunda ya Tunywe gake?.”
Abandi bakobwa barimo Kelia Ruzindana ufite ikamba rya Miss Photogenic yunze mu rya Muheto Divine avuga ko muri ubu bukwe nta nzoga zigeze zihabwa abari babufitemo inshingano cyane cyane abambariye umugeni.