Abakandida umunani mu bahatanye ku mwanya wa Perezida muri Repubulika ya Demokarasi ya Congo bariye karungu, barasaba ko ibyavuye mu matora yo mu Ukuboza 2023, bisibwa kuko byabayemo ubujura bukabije.
Mu kiganiro n’Itangazamakuru, Anzuluni, Diongo, Martin Fayulu, Kikuni, Matata Ponyo, Mukwege na Sesanga bavuze ko biteye isoni kubona CENI itesha agaciro intsinzi y’abadepite 82, inasiba ibyavuye mu matora yose mu karere ka Yakoma muri Nord Ubangi.
Martin Fayulu yatangaje ko kuba ibyavuye mu matora kuri abo bantu 82 byarasibwe na CENI, byerekana ubujura bwabaye mu gihugu hose.
Yagize ati ” Ibi byerekana ko habaye ubujura bukabie, cyane cyane ko bigaragara ko abari bafite imashini zo gutora bose ari abo mu ruhande rwa Tshisekedi kandi bafite n’imyanya muri Leta.”
Ntibumva uko Komisiyo y’amatora, CENI, yemera ko habaye ubujura mu matora y’Abadepite gusa kandi amatora yarabereye rimwe hakorejeshwe ikarita imwe yo gutora.
- Advertisement -
Mu izina ry’abo biyamamaje bose, Martin Fayulu yavuze ko ubwo bujura bw’amatora bwerekanye ko hariho gukorana hagati y’ishyaka riri ku butegetsi, inzego za Leta na CENI.
Akomeza avuga ko ariyo mpamvu CENI yananiwe kugaragaza ibiro by’amatora byakoreshejwe, umubare w’imashini zo gutora, amakarita y’itora yasohowe hamwe n’imashini zo gutora zahawe Union sacrée ya Tshisekedi.
Abo bakandida bitoje ku mwanya w’umukuru w’igihugu basabye kandi ko akanama ko gutegura amatora CENI n’abo bakoranye bashyikirizwa ubutabera.
Komisiyo y’amatora, CENI, ivuga ko mu iperereza bakoze ku matora y’Abadepite benshi mu bahataniye iyo myanya bishoye mu bujura, kubera ibyo, intsinzi ya bamwe ikaba yarabaye impfabusa.
Gusa ku mwanya w’umukuru w’igihugu, CENI ivuga ko amatora yagenze neza aho uwatsinze ari Tshisekedi, ibyo abo bahatanye bavuga ari nko kuruhira ubusa
NDEKEZI JOHNSON / UMUSEKE.RW