U Burundi bwemeye ko bupfusha abasirikare muri Congo

Umuvugizi w’Igisirikare cy’u Burundi, Brigadier General Gaspard Baratuza, yatangaje ko abasirikare boherejwe mu mirwano muri RD Congo bicwa kubera ko bari ku rugamba, kandi ko gupfa ari kimwe mu byo basinyiye, yongeraho ko no muri ‘douche’ umuntu anyerera akitura hasi agashiramo umwuka.

Yavugiye ibi mu kiganiro yagiranye n’itangazamakuru ku wa 16 Mutarama 2025 cyibanze ku bikorwa ingabo z’u Burundi zoherejwemo mu Burasirazuba bwa Repubulika ya Demokarasi ya Congo.

Ni nyuma y’amakuru yashyizwe hanze n’umutwe wa M23 wigambye ko wivuganye abasirikare b’u Burundi barenga 200, barimo n’ab’ofisiye, biciwe mu mirwano yabereye i Ngungu muri teritwari ya Masisi.

Abaturage bari i Ngungu batangaje ko ingabo z’u Burundi zahunze zisiga amahema, ibikoresho byo mu gikoni, n’imyenda yazo.

Abo baturage bagize bati: “Bagiye basiga amahema yabo, ibikoresho byo mu gikoni, n’imyenda yabo.”

Brig Gen Baratuza yavuze ko nyuma yo kuzonga umutwe wa M23, ubu bahanganye n’intambara y’umunwa ibera ku mbuga nkoranyambaga, aho yabeshyuje amakuru avuga ko abasirikare b’Abarundi barenga 200 biciwe muri RDC.

Ati: “Imibare bohereza ni ukugira ngo batere ubwoba, bahahamure mwebwe Abarundi, mwumve muti abana bacu bahonnye.”

Yavuze ko igisirikare gifite imirongo gikoresha mu kumenyesha imiryango y’abasirikare bapfira ku rugamba kandi ko iyo miryango ifashwa, ahakana abavuga ko u Burundi buhisha amakuru y’abapfira ku butaka bwa Congo.

Ati: “Uwitabye Imana baramuzana, n’aho yaba ari muri Centrafrique cyangwa muri Somaliya, nkanswe aho duhana urubibi, baramuzana. Babihishira iki? Ntabyo guhisha.”

Yavuze ko umuntu wese afite itariki azitabiraho Imana, kandi ko buri umwe ayigendana mu mufuka, ko nta kamaro ko guhisha umuntu utakiriho.

Yahamije ko nta gahunda ya vuba yo kuva muri Congo bafite, mu gihe hataraboneka umutekano, kuko iyo Congo idatekanye, u Burundi budasinzira.

Ati: “Kurwanya umwanzi no gufasha igihugu duturanye byarabaye, kandi n’ubu birakomeje, kuko umutekano ku mbibi dusangiye turawushaka. Igihugu cya Congo kidafite umutekano, u Burundi ntibuwugira.”

Umutwe wa M23 uhanganye n’ihuriro rigizwe n’ingabo za RDC (FARDC), umutwe w’iterabwoba wa FDLR, imitwe ya Wazalendo, ingabo z’u Burundi, ndetse n’abacancuro b’Abanyaburayi.

Ubuyobozi bw’uyu mutwe butangaza ko ingabo z’igihugu cy’u Burundi zikomeje kwicirwa ku rugamba, abandi bagakwira imishwaro, hakaba n’abafatwa mpiri.

NDEKEZI JOHNSON / UMUSEKE.RW