Mu karere ka Bugesera,mu Murenge wa Ntarama, mu cyahoze ari komine kanzeze bibutse imiryango isaga 700 yishwe muri Jenoside yakorewe Abatutsi, yazimye burundu harimo isaga 100 yari ituye ku musozi wa Nyirarukobwa.
Igikorwa cyo kwibuka iyi miryango yazimye cyabaye ku wa Gatandatu tariki 18 Mata 2026, mu muhango wabereye ku musozi wa Nyirarukobwa uherereye mu Murenge wa Ntarama mu Karere ka Bugesera.
Ni igikorwa cyateguwe na Nyirakubwoba Family,ihuriro rihuza abarokotse Jenoside bigaga ku ishuri ribanza rya Nyirarukobwa mu rwego rwo Kwibuka ku nshuro ya 32 Jenoside yakorewe Abatutsi.
Mbere ya Jenoside yakorewe Abatutsi ku musozi wa Nyirarukobwa hari hatuye imiryango isaga 100 y’Abatutsi, yose yishwe muri Jenoside bituma izima burundu.
Undi mwihariko uri muri aka gace ni uko nta Gacaca yahabaye kuko nta muntu waharokokeye wari gutanga amakuru kuko selile yose ya Nyirarukobwa yari yishwe muri Jenoside yakorewe Abatutsi.
Mu buhamya bwatanzwe na Ndahiro Yvette , yagaragaje inzira y’umusaraba yanyuzemo n’uburyo Interahamwe zagize uruhare mu kwica Abatutsi bari bahungiye ku musozi wa Kayumba, Nyirarukobwa, Kanzenze n’ahandi.
Yashimiye Inkotanyi zahagaritse Jenoside ndetse zikanubaka Igihugu cyimakaza ubumwe mu Banyarwanda.
Ati “ Twaje kubona imiryango tujyamo, kwiga turiga, Ikigega cyita ku bacitse ku icumu FARG iraturihira turiga,baduha inka, baduha inzu, barihirira abana bariga, ndashyingira . Nanjye ubu ndi umudamu ifite abana batatu n’umugabo, twariyubatse barakoze, Inkotanyi zarakoze. Harakabaho inkotanyi.”
Karemera Gaudence, ni umwe mu barokotse mu bigaga kuri iri shuri ribanza rya Nyirarukobwa ryaje gusenywa burundu ariko akaba anahagarariye iri huriro rya Nyirarukobwa Family . Yavuze uburyo Abatutsi bishwe , batereranywe n’Isi yose.
Yongeyeho ko Jenoside yakorewe Abatutsi yabaye Nyirarukobwa by’umwihariko yakoranywe ubugome ku buryo n’ishuri ryizwemo n’Abatutsi ryarimbuwe burundu.
Ati “ Aha hahoze ishuri rimwe rukumbi, ahahoze ari segiteri kanzenze . Benshi mu baryizemo barishwe, umubare munini w’abarimu uricwa ,ishuri bararisenya bararirimbura.”
Akomeza ati “ Ibi byerekana uburyo ubugome n’ubukana Jenoside yakoranywe.”
Karemera yashimiye ubuyobozi bw’igihugu n’ubw’Akarere bwashyizeho gahunda yo Kwibuka Jenoside yakorewe Abatutsi.
Yasabye ko Nyirarukobwa hashyirwa ibimenyetso byafasha gusigasira amateka .
Umuyobozi w’Akarere ka Bugesera, yakomeje Abarokotse Jenoside yakorewe Abatutsi by’umwihariko aba Nyirarukobwa , ashimangira ko Kwibuka bifasha guharanira ko Jenoside itakongera kubaho ukundi.
Ati “ Kuba turi hamwe ni ikimenyetso cy’amahitamo yo giharanira ubumwe n’ejo h’igihugu cyacu. Ni ukwigisha abato amateka nyayo yacu hato batazarangara akisubira. “
Visi Perezida wa Kabiri wa IBUKA, Ndizihiwe Blaise, yibukije ko Kwibuka imiryango yazimye ari ukwibutsa ko urwango n’ivangura bisenya igihugu cyose mu gihe gito.
Yasabye ko Abanyarwanda bagira umuhigo ko Jenoside yakorewe Abatutsi itakongera kubaho ukundi , abasaba kurangwa n’ubumwe.
Yashimangiye ko imiryango yazimye itibagiranye kuko u Rwanda rwose ari yo miryango yabo.
Ati “Ku miryango yazimye nubwo batagihari, ndagira ngo mbabwire ko batibagiranye nubwo ntawe basigaranye mu maraso, barahari mu mitima yacu kandi u Rwanda rwose ni umryango wabo.”
Depite Uwubutatu Marie Thérèse wari umushyitsi Mukuru, yibukije ko icyaha cya Jenoside kidasaza bityo abagize uruhare muri Jenoside bazagezwa mu butabera.
Yashimiye ingabo z’ Inkotanyi zari ziyobowe na Perezida wa Repubulika zahagaritse Jenoside, zikarokora Abatutsi bicwaga.
Yasabye Abanyarwanda kwirinda no kurwanya ingengabitekerezo ya Jenoside , yizeza ko igihugu kizakomeza kwita ku mibereho y’abarokotse Jenoside.
Ati “ Ubuyobozi bw’igihugu buzakomeza gushyira imabaraga mu mibereho y’abarokotse cyane cyane abafite intege nke kugira ngo babashe kubaho neza .”
Mu bushakashatsi bwakozwe na IBUKA , bugaragaza ko kugeza ubu hamaze kugaragara imiryango 15.593 igizwe n’abantu 68 871 yose yazimye. Mu ntara y’Iburasirazuba habarurwa imiryango 2246 igizwe n’abantu 9979 yazimye. Mu karere ka Bugesera ho barurwa imiryango irenga 7 32 .
UMUSEKE.RW
