Abantu 42 bapfuye abandi 10 barakomereka mu mirwano yabaye hagati y’amoko abiri ashyamiranye mu burasirazuba bwa Chad aho intandaro y’imirwano ari impaka zavuye ku iriba ry’amazi.
Ni amakimbirane ari mu gace kitwa Wadi Fira akaba yaratangiye ari imiryango ibiri ishyamiranye, biza guhinduka amakimbirane yagutse y’abatuye muri ako gace nk’uko BBC ibivuga.
Ku Cyumweru intumwa ziyobowe na Minisitiri w’Intebe wungirije muri Chad, Limane Mahamat zoherejwe muri kariya gace guhosha ayo makimbirane.
Amakimbirane nk’ariya muri Chad ngo akunze kubaho akenshi bigaturuka ku bushyamirane bw’abahinzi n’aborozi.
Intandaro y’ayo makimbirane ngo ni ugushaka kugenzura amazi ndetse n’ubutaka buriho ubwatsi bw’amatungo.
Bitewe n’impunzi zagiye ziva muri Sudan, zihunze imirwano, BBC ivuga ko byongereye ikibatsi mu muriro bitewe no gushaka ubutunzi, ndetse umutekano warushijeho kuba mubi.
Minisitiri w’Intebe wungirije wa Chad yavuze ko igihugu cye kirimo gukora ibishoboka ngo imirwano ibera muri Sudan itagira ingaruka mbizo guhungabanya umutekano ku ruhande rw’igihugu cye.
Imirwano nk’iriya muri Chad yagiye ihitana abantu batandukanye, mu Ugushyingo 2025 mu gace ka Dibebe, abantu 33 baguye mu bushyamirane nka buriya buturutse ku ivomo.
Umuryango International Crisis Group uvuga ko abantu 1,000 bishwe abandi 2,000 barakomereka hagati ya 2021 na 2024 biturutse ku bushyamirane 100 bwabereye ahantu hatandukanye muri Chad.
Amnesty International yo yatangaje mu mwakaushize ko igenzura yakoze yasanze ubushyamirane hagati y’aborozi n’abahinzi bwaraguyemo abantu 98 hagati ya 2022 na 2024.
IVOMO: BBC
UMUSEKE.RW
