Indi kipe ihagarariye umugabane wa Africa irasezerewe mu mikino y’igikombe cy’Isi, gusa uko ivuyemo bamwe mu bakurikirana umupira w’amaguru bemeza ko ntako itagize.
Cabo Verde ni ikipe itari ifite amateka na make mu mikino y’igikombe cy’isi mu mupira w’amaguru, ariko kuri uyu mugoroba wa tariki 03 Nyakanga 2026 yari urutare kuruta izina ry’ikibuga bakiniyeho kitwa Hard Rock Stadium mu mujyi wa Miami muri leta ya Floride muri America.
Assamoah Gian wakiniye Ghana avuga ko Cabo Verde ikwiye kubera urugero andi makipe ya Africa mu gukina neza nta gihunga no kwihagaraho imber ey’amakipe yitwa ibigugu.
Cabo Verde yakinaga na Lionel Messi na Argentina ifite igikombe cy’Isi giheruka, ariko byasaga naho ari mbiri mbiri!
Argentina yafunguye amazamu ibifashijwemo na Lionel Messi ku munota wa 29′ ku mupira yahawe na Lisandro Martínez. Ni nako igice cya mbere cyarangiye.
Ku munota wa 59′ Cabo Verde yishyuye ibifashijwemo na Deroy Duarte ku mupira yahawe na Ryan Mendes.
Uko niko iminota 90 +8 y’umukino yarangiye.
Mu minota mike y’inyongera y’iminota 30 yongeweho ngo amakipe yikiranure, ku munota wa 2′ gusa, Lisandro Martínez yatsindiye Argentina ahawe umupira na Alexis Mac Allister.
Ntabwo byari birangiye ku munota wa 103′, umukinnyi Sidny Lopes Cabral w’imyaka 23 winjiye asimbuye, yarekuye urutambi, umupira ugana neza muri degere 90 z’izamu ntabwo umunyezamu Martinez wa Argentina yamenye uko bigenze, biba 2-2.
Argentina yagowe cyane n’uyu mukino nubwo yahabwaga amahirwe cyane, yaje gutsinda igitego cya Gonzalo Montiel ku munota wa 115′.
Ni uko byarangiye ari Argentina igiye muri 1/8 cy’irangiza, itsinze 3-2 bya Cabo Verde.
Uyu mukino ntuzibagirana aho ikipe yitwa nto yahagamye igihangange kinafite igikombe cy’Isi, kongeraho igitego cyiza cyatsinzwe na Sidny Lopes Cabral.
Cobe Verde yagaragaje ko amaguru akina umupira ari abiri kuri abiri, dore ko yahereye kuri Spain/Espagne iyitungura bakanganya 0-0.
Ikipe ya Misiri na yo yakomeje kuri penaliti itsinze Australia, ni na yo izahura na Argentina. Ghana na yo irakina na Colombia.
UMUSEKE.RW
