Ishuri Saint Gabriel (Ecole Primaire et Maternelle Saint Gabriel), risanzwe rikorera mu Murenge wa Kimironko mu Karere ka Gasabo, ryafunguye ishami rishya riherereye i Kabuga mu Murenge wa Rusororo, mu rwego rwo kurushaho kwagura serivisi z’uburezi ritanga.
Ishami rishya rya Ecole Primaire et Maternelle Saint Gabriel riherereye mu Kagari ka Nyagahinga, Umurenge wa Rusororo mu Karere ka Gasabo, ryafunguwe ku mugaragaro kuri iki Cyumweru, tariki ya 12 Nyakanga 2026.
Iri shami rifite inyubako zubatswe mu buryo bugeretse (etaje), zirimo ibyumba by’amashuri byagenewe kwakira abanyeshuri biga kuva mu mashuri y’inshuke kugeza mu mwaka wa gatandatu w’amashuri abanza.
Mu muhango wo gutaha iri shami rishya, hanabaye ibirori byo guha impamyabushobozi abanyeshuri 71 barangije amashuri y’inshuke ndetse n’abanyeshuri 58 basoje icyiciro cy’amashuri abanza.
Ubuyobozi bw’iri shuri bwatangaje ko muri rusange risanzwe ryigamo abanyeshuri 494.
Sasha, umwe mu banyeshuri barangije umwaka wa gatandatu w’amashuri abanza muri iri shuri, yavuze ko ubumenyi bahawe n’abarimu bwabateguriye gukomeza neza amasomo mu mashuri yisumbuye.
Ati “Mbere na mbere reka dushimire abarimu bacu batuyoboye neza bakadutera imbaraga mu gihe twacikaga intege. Ibyo badukorera ni byo byatumye tuba abo turi bo. Ndabasezeranya ko twakoze neza ibizamini bya Leta bisoza amashuri abanza.”
Yifashishije amagambo y’umuhanga mu mitekerereze wo mu Bushinwa, Confucius, wagize ati “Ntabwo kugenda gake ari cyo kibazo, icy’ingenzi ni ukutagira aho uhagarara,” yasabye bagenzi be gukomeza kugira umurava no kudacika intege mu rugendo rw’amasomo yabo.
Umuyobozi wa Ecole Primaire et Maternelle Saint Gabriel, Mukabadege Adrienne, yashimiye abanyeshuri barangije ibyiciro bitandukanye, anashimira ababyeyi bakomeje kugirira icyizere ishuri bakariha abana babo ngo ribarere.
Ati “Ababyeyi, iyo mutatugirira icyizere ibi ntabwo byari kuba. Abana baza barira, ariko mukabahumuriza mukababwira ngo musanze ababyeyi. Mutugirira icyizere, mugakomeza kudushyigikira, ari na byo byatumye tugera aho tugeze uyu munsi.”
Yavuze ko gufungura ishami rishya ari intambwe igamije kurushaho kwegera ababyeyi no gukomeza gutanga uburezi bufite ireme ku bana bo mu bice bitandukanye bya Kigali.
