Abahagarariye ibihugu bitandukanye mu bya gisirikare (Defence Attachés) bemerewe gukorera mu Rwanda, basangijwe ishusho rusange y’umutekano mu Karere no ku rwego mpuzamahanga ndetse n’ibikorwa Ingabo z’u Rwanda zikomeje gukora byo kubungabunga amahoro.
Ibi biganiro byateguwe na Minisiteri y’Ingabo n’Ingabo z’u Rwanda byabaye kuri uyu wa Kabiri tariki ya 11 Kanama 2026, byahuje ba ‘Defence Attachés’ n’intumwa zihagarariye ibihugu n’imiryango mpuzamahanga itandukanye birimo Angola, Brazil, u Bushinwa, Denmark, Misiri, u Budage, u Buhinde, u Buyapani, Jordan, Luxembourg, u Buholandi, Sénégal, Tanzania, Türkiye, Uganda, u Bwongereza, Amerika n’Umuryango w’Ubumwe bw’u Burayi (EU).
Minisiteri y’Ingabo, MINADEF, yavuze ko ibi biganiro bitegurwa mu rwego rw’ibikorwa bisanzwe byayo byo gukorana n’abahagarariye ibihugu byabo mu bya dipolomasi, bikaba urubuga rukomeye rwo gusangira amakuru, kugirana ibiganiro byubaka no kungurana ibitekerezo ku bibazo bigira ingaruka ku mutekano w’igihugu, uw’akarere ndetse n’uw’isi muri rusange.
MINADEF isobanura ko Uwo yatangizaga ibi biganiro, Brig Gen Patrick Karuretwa, Umuyobozi Mukuru ushinzwe Ubufatanye Mpuzamahanga mu bya gisirikare akaba n’Umuvugizi w’Ingabo z’u Rwanda, yahaye ikaze ababyitabiriye anagaragaza agaciro u Rwanda ruha ibiganiro bifunguye kandi bihoraho rugirana n’abahagarariye ibihugu mu bya gisirikare.
Yagize ati “Uretse gutanga ishusho rusange y’uko umutekano uhagaze, ibi biganiro bidufasha gusobanura neza aho u Rwanda ruhagaze ku bibazo duhuriyeho. Binatuma habaho imyumvire imwe iboneye hagati y’inzego zacu z’ingabo n’ibihugu muhagarariye.”
Ibi biganiro bifunguye byahaye abahagarariye ibihugu mu bya gisirikare mu Rwanda, amahirwe yo kuganira imbonankubone n’abahagarariye Minisiteri y’Ingabo n’Ingabo z’u Rwanda, bikabafasha kurushaho gusobanukirwa ibyihutirwa mu bikorwa by’u Rwanda n’uko rubona umutekano w’akarere.
Minisiteri y’Ingabo igaragaza ko ifata umuryango w’abahagarariye ibihugu mu bya gisirikare bemerewe gukorera mu Rwanda nk’abafatanyabikorwa b’ingenzi mu gushimangira umubano mu bya gisirikare, icyizere hagati y’impande zombi no guteza imbere ubufatanye bufatika mu bya gisirikare hagati y’u Rwanda n’abafatanyabikorwa mpuzamahanga.
