Mu gihe habura amasaha abarirwa ku ntoki ngo ikipe y’Ingabo yakire Zamalek SC yo mu Misiri mu mukino ubanza w’ijonjora rya kabiri ry’imikino Nyafurika ihuza amakipe aya mbere iwayo [CAF Champions League], Abanyarwanda benshi bayikunda bahamya ko amateka yakwisubiramo abanya-Misiri bakongera gutsindirwa i Kigali.
Ku wa Gatanu, tariki ya 16 Ukwakira 2026 Saa Kumi n’Ebyiri z’Umugoroba muri Stade Amahoro, hateganyijwe umukino ufite igisobanuro kinini, uzahuza APR FC na Zamalek SC mu ijonjora rya kabiri riganisha kujya mu matsinda ya CAF Champions League.
Ni amakipe afitanye amateka kuko si ubwa mbere agiye guhura muri aya marushanwa Nyafurika ahuza ibigugu byitwaye neza ku Mugabane wa Afurika.
Mu nshuro enye izi kipe zimaze gukina, Zamalek SC yatsinzemo ebyiri, ikipe y’Ingabo itsinda rimwe mu gihe banganyije indi nshuro imwe.
Amateka ya 2004 yakwisubiramo muri Stade Amahoro?
Umwe mu mikino Abanyarwanda batazibagirwa, ni uwo APR FC yatsinzemo iki kigugu ibitego 4-1 wari uwo kwishyura w’ijonjora rya kabiri muri CAF Champions League yitwaga African Cup of Champions Clubs.
Ubanza wari wabereye mu Misiri, APR FC yari yahatsindiwe ibitego 3-2 maze isezerera Zamalek SC ku giteranyo cy’ibitego 6-5. Ikipe y’Ingabo yatozwaga na nyakwigendera, Jean Marie Ntagwabira.
Abanya-Misiri bakongera gukorera amateka i Kigali?
Ni umwaka Abanyarwanda batazibagirwa kuko ikipe y’Ingabo yanyagiriwe mu Misiri n’iki kigugu ibitego 6-0 mu gihe uwo kwishyura wabereye i Kigali, warangiye amakipe yombi anganyije 0-0.
Amakipe yombi ntabwo anganya ibigwi muri iri rushanwa!
Zamalek SC imaze kwegukana ibikombe bitanu bya CAF Champions League mbere byitwaga ‘African Cup of Champions Clubs.’ Yabyegukanye mu 1984, 1986, 1993, 1996 na 2002.
Mu gihe ikipe y’Ingabo yo ikirwana n’umuhigo wo kujya mu matsinda y’iri tsinda rihuza ibigugu ku Mugabane wa Afurika.
APR FC ntihirwa n’amakipe yo mu Misiri!
Mu myaka ya vuba, imibare igaragaza ko ikipe y’Ingabo itigeze ihirwa no gukina n’amakipe yo mu Misiri, cyane cyane, Pyramids FC.
Mu mwaka ushize, Pyramids FC yasezereye APR FC mu ijonjora ryaganaga mu matsinda ya CAF Champions League. Umukino ubanza yatsindiwe i Kigali ibitego 2-0 byombi byatsinzwe na Fiston Kalala Mayele.
Uwo kwishyura, APR FC yatsindiwe mu Misiri ibitego 3-0 byatsinzwe na Mostafa Zico, Ahmed Atef Qattah na Mohamed Hamdy.
Mu 2024, ikipe y’Ingabo yanganyije na Pyramids FC igitego 1-1 mu mukino wabereye i Kigali mu gihe uwabereye mu Misiri warangiye APR FC ihatsindiwe ibitego 3-1.
Mu 2023, APR FC yanyagiriwe mu Misiri na Pyramids FC ibitego 6-1.
Ikipe zombi zakoze imyitozo ya nyuma kuri uyu wa Kane muri Stade Amahoro. Umutoza w’ikipe y’Ingabo, Taleb aherutse kuvuga ko Zamalek SC itamuteye ubwoba ndetse yizeye ko abasore be biteguye neza.
Ubwo yari amaze gukina na AS Muhanga umukino wa gicuti, uyu munya-Tunisia, yavuze ko biteguye neza mu mpande zose.
Ati “Turiteguye kandi dufite imbaraga zose. Abafana bazaze badushyigikire tuzakina neza. Dufite abakinnyi 24 biteguye gukina umukino utaha, tuzatanga byose kandi kubera Imana tuzatsinda.”
Iyo urebye mu maso h’abakinnyi ba APR FC, ubonamo icyizere n’inyota byo kuzongera gusubiramo amateka nk’aya 2004 ubwo bayigarikiraga muri Stade Amahoro.
Bamwe mu bakinnyi ba Zamalek SC bo guhanga amaso, Mohamed Ismail ukina nka myugariro wo hagati, Mahmoud El Wensh nawe ukina nka myugariro wo hagati, Oday Dabbagh ukina mu gice cy’ubusatirizi, Mohamed Shehata ukina hagati mu kibuga afasha ba myugariro, Omar Gaber ukina ku ruhande mu bwugarizi akaba na kapiteni wayo.
Hari kandi Ahmed Fatouh ukina ku ruhande mu bwugarizi na Mahmoud Bentayg ukina ku ruhande rw’ibumoso mu bwugarizi.
Bamwe bahanzwe amaso ku ruhande rw’ikipe y’Ingabo, harimo kapiteni wayo, Djibril Quattara, William Togui, Byiringiro Gilbert uzwi nka Kagege, Amadou Zon, Dauda Yussif n’abandi.
UMUSEKE.RW
