Mbere y’uko itangira Shampiyona y’Icyiciro cya mbere ya Volleyball y’abagore, ikipe ya RRA WVC, yasinyishije abakinnyi bane bazayifasha mu rugendo rw’uyu mwaka w’imikino 2026-27.
Iyi kipe y’Ikigo cy’Igihugu Gishinzwe Imisoro n’Amahoro, yatangaje abakinnyi bane bashya bamaze gushyira umukono ku masezerano yayo nk’abakozi bayo bashya.
Aba barimo Uwingabire Denyse na Mukazi Jolie bombi bavuye muri APR WVC. Hari kandi Ana Beatriz ukora amanota aciye iburyo [Right attacker] na Thabata Graziele de Carmo ukora amanota aciye ibumoso [Left attacker].
Mu nama yahuje ubuyobozi bw’iyi kipe n’abakinnyi ndetse n’abatoza, hanemejwe ko Tuyishimire Aloysia ari we kapiteni wa RRA WVC.
Umuyobozi w’ikipe, Uwitonze Jean Paulin, yasabye abakinnyi n’umutoza, Mutabazi Elie n’abamwungirije, kongera gukora byose ngo bagarure igitinyiro iyi kipe yahoranye mu myaka yashize. Iheruka igikombe cya Shampiyona mu 2023.
Kuri uyu wa Gatanu, ni bwo hateganyijwe itangira rya Shampiyona y’uyu mwaka mu bagabo n’abagore. Hateganyijwe imikino ibiri mu bagabo n’umwe mu bagore.
APR VC iraza kwakira KVC VC Saa Cyenda z’amanywa mu gihe Police WVC iza kwakira Kepler WVC Saa Kumi n’Imwe n’igice z’amanywa, naho Gisagara VC ize kwakira Police VC Saa Mbiri z’Ijoro. Iyi mikino yose irabera muri Petit Stade.
UMUSEKE.RW
