Guverinoma ya Repubulika Iharanira Demokarasi ya Congo (RDC) yatangaje ko ihagaritse ibikorwa by’amashyaka n’imitwe ya politiki 13 mu gihugu hose, harimo n’ishyaka rya PPRD, Joseph Kabila yahozemo mbere y’uko ashinga FRN yasimbuye AFC/M23.
Iki cyemezo cyatangajwe ku wa 15 Ukwakira 2026 na Minisitiri w’Intebe wungirije akaba na Minisitiri w’Umutekano w’Imbere mu Gihugu, Jacquemain Shabani Lukoo, wasabye abayobozi b’intara kugishyira mu bikorwa nta gutinda.
Amashyaka n’imitwe ya politiki 13 yahagaritswe arimo ishyaka rya PPRD ryari ryarashinzwe na Joseph Kabila wategetse Repubulika Iharanira Demokarasi ya Congo hagati ya 2001 na 2019.
Joseph Kabila i Goma ku wa 12 Ukwakira 2026, yari aherutse kuhashingira umutwe wa politiki ufite n’igisirikare witwa Front pour la Refondation de la Nation (FRN), nyuma yo kwihuza n’abari abayobozi bakuru bo mu Ihuriro rya AFC/M23 ryasheshwe
Uretse PPRD ya Joseph Kabila, andi mashyaka yafunzwe harimo irya LGD rya Matata Ponyo, PISTE-E rya Noël Tshiani na AAP rya Théophile Bemba Fundu.
Harimo kandi UDA originelle rya Claudel Lubaya, MPCR ya Jean-Claude Vuemba, ATD ya José Makila Sumanda, PNEL ya Michel Mwika Banza, MLP ya Franck Diongo, UPC ya Thomas Lubanga, ADCP ya Corneille Nangaa, COFEDEC ya Filia Tshipasa Kahindo na AARC ya Elisée Minembwe.
Ntihatangajwe impamvu y’ihagarikwa ry’ibikorwa by’aya mashyaka.
Mu butumwa Minisitiri Shabani yoherereje ba Guverineri b’Intara, yabasabye gufata ingamba zikenewe kugira ngo icyo cyemezo gishyirwe mu bikorwa mu gihugu hose, ashimangira ko kigomba kubahirizwa mu buryo budasubirwaho.
Iki cyemezo gifashwe mu gihe muri RDC hakomeje gututumba umwuka mubi wa politiki ahanini bitewe n’amashyaka amwe namwe atavuga rumwe n’ubutegetsi yihurije mu Ihiruro ryiswe ‘C64’ rivuga ko riharanira ko Itegeko Nshinga ritazahinduka ngo manda Umukuru w’Igihugu yemererwa zibe zavugururwa, ibyaharurira inzira Perezida Felix Tshisekedi akaba yazakwiyamamaza mu matora yo mu 2028.
MUGIRANEZA THIERRY/ UMUSEKE.RW
