Perezida Paul Kagame na Madamu Jeannette Kagame mu gitondo cyo kuri uyu wa Gatanu tariki 13 Ugushyingo 2026, bakiriwe n’Umwami Preah Bat Samdech Preah Boromneath Norodom Sihamoni wa Cambodia.
Umuhango w’icyubahiro wo kubakira wabereye mu Ngoro y’Ubwami iherereye i Phnom Penh.
Perezida Paul Kagame na Madamu Jeannette Kagame bari muri Cambodia kuva ku wa Kane tariki ya 12 Ugushyingo 2026, aho bari mu ruzinduko rw’akazi ndetse no kwitabira Inama ya 20 y’Abakuru b’Ibihugu bigize Umuryango w’Ibihugu bikoresha ururimi rw’Igifaransa (OIF).
Biteganyijwe ko kuri uyu wa Gatanu, Perezida Kagame na Madamu Jeannette Kagame banasura ahari Urwibutso rwo kwibuka no guha icyubahiro Preah Bat Samdech Preah Norodom Sihanouk, Umwami wahoze ayobora iki gihugu.
Perezida Kagame azahura anaganire na Samdech Akka Moha Sena Padei Techo Hun Sen, Perezida wa Sena na Samdech Maha Rathsapheathika Thipadei Khuon Sudary uyobora Inteko Ishinga Amatageko ya Cambodia.
Umukuru w’Igihugu kandi azagirana ibiganiro na Samdech Moha Bovor Thipadei Hun Manet, Minisitiri w’Intebe wa Cambodia, ahazasinyirwa amasezerano hagati y’u Rwanda na Cambodia.
Perezida Kagame na Madamu Jeannette Kagame bazanitabira umusangiro wateguwe n’Umwami Norodom Sihamoni.
Ku wa 15 na 16 Ugishyingo 2026, Umukuru w’Igihugu azitabira Inama ya 20 y’Abakuru b’Ibihugu na za Guverinoma bigize Umuryango w’Ibihugu bikoresha Igifaransa (OIF).
