Mu gihe habura amasaha make ngo hatangire Shampiyona y’Abagore y’Icyiciro cya mbere [Rwanda Women’s Super League] y’umwaka w’imikino 2026-27, amakipe akomeje guhiga.
Iyi Shampiyona, biteganyijwe ko izatangira ejo ku wa 14 Ugushyingo 2026. Amakipe 12, ni yo azayitabira. Abiri arimo Gakenke Ladies WFC na Rambura WFC, ni yo mashya yazamutse uyu mwaka, mu gihe Kigali WFC yahoze ari AS Kigali WFC na Nyagatare WFC, ari zo zazamutse mu cyiciro cya kabiri.
Mu makipe 12, UMUSEKE wagerageje kumenya uko amwe mu makipe yiyubatse n’intego afite muri Shampiyona y’uyu mwaka w’imikino 2026-27.
Uko amwe mu makipe yiyubatse n’intego zayo.
Rayon Sports WFC: Nk’ikipe ibitse igikombe cya Shampiyona n’icy’Amahoro by’umwaka w’imikino ushize 2025-26, n’ubundi ntiri kure y’iyo ntego yo kubyisubiza. Yabanje gutandukana n’abatoza barimo Fleury na Fidèle ariko basimburwa na Calliope na Uwimana Abdoul.
Iyi kipe imaze kubaka izina muri ruhago y’abagore mu Rwanda, yinjije abakinnyi bazayifasha kugera ku ntego zayo.
Mu bo yinjije, harimo Uzayisenga Lydia, Uwimpaye Divine, Uwabeza Sylivie, Umurangwa Celine, Ishimwe Amizero Evelyne, Elena Obono, Uwimana Aniella. Yasohoye abarimo Mukagatete Emeline, Nahimana Nasra, Nyiramwiza Marthe, Umwali Uwase Dudja na Uwimbabazi Immaculée.
Rambura WFC: Iyi kipe yazamutse muri uyu mwaka, yazamukanye intego ikomeye yo kuza mu makine ane ya mbere nk’uko Uwineza Nadia uyitoza, yabyemereye UMUSEKE. Yongeyemo kandi umutoza wungirije, Habimana Nuru wahoze muri Forever Girls WFC.
Mbere kandi yo gutangira Shampiyona, abanyamuryango bayo bashyizeho ubuyobozi bushya buyobowe na Mukankaka Ancille. Iyi kipe yinjije abakinnyi benshi bo kuyifasha kuzagera ku ntego zayo z’uyu mwaka w’imikino.
Mu bashya bazagaragara mu mwambaro wa Rambura WFC, harimo Yankurije Aline wavuye muri Police WFC, Uwineza Dina wavuye muri Macuba WFC, Uwineza Djazira nawe wavuye muri Macuba WFC, Niyibishaka Emerance wavuye muri Muhazi United WFC.
Hari kandi Fillette wavuye muri Kayonza WFC, Urimubenshi Claudine wavuye muri Forever Girls WFC, Musengimana Dalia, Rwibutseo Bèatrice, Umuhoza Pascaline na Niyonsenga Janvière.
Yatandukanye n’abarimo Uwizeyimana Médiatrice, Uwimbabazi Alliance, Uwajeneza Pascaline, Uwajeneza Joselyne, Umutoniwase Celine, Niyonsenga Seraphine, Manirakiza Clèmentine, Irakoze Benitha na Ahinkuye Marie.
Macuba WFC: Iyi kipe yo mu Karere ka Nyamasheke, igiye gukina umwaka wayo wa kabiri muri Shampiyona y’Icyiciro cya mbere [Rwanda Women’s Super League], nyuma yo kuza mu myanya itandatu ya mbere ku mwaka wayo wa mbere.
Ntabwo yifuje guhindura cyane ikipe yayigejeje kuri uwo mwanya, kuko yatandukanye n’abakinnyi babiri gusa, yinjiza abandi babiri. Yarekuye Uwineza Djazira na Mukamana Denyse mu gihe yaguze Uwera Aline na Muhewenimana Hadja.
Nyuma yo kuza mu makipe atandatu ya mbere ikizamuka, yabonye ko kuza mu makipe ane nabyo bishoboka ndetse ibigira intego y’uyu mwaka.
Kamonyi WFC: Ni ikipe yagaragaje guhangara izikomeye mu mwaka ushize, nyuma yo gutsinda Rayon Sports WFC yegukanye Shampiyona na Police WFC yabaye iya kabiri.
Yatakaje umwe mu nkingi zayo za mwamba, Ishimwe Amizero Everyne wayitsindiye ibitego byinshi ariko ubu akaba ari muri Rayon Sports WFC, Rebbeca ndetse n’uwari umunyezamu wayo.
Nyuma yo gutakaza abo bakinnyi, mu rwego rwo guha amahirwe abakiri bato, Kamonyi WFC yahisemo kuzamura abakinnyi umunani ibakuye mu batarengeje imyaka 20 bayo.
Kuzamura abakiri bato, ntabwo bikuraho ntego yabo yo kuzahatanira kuba mu makipe ane ya mbere nk’uko ubuyobozi bwabihamirije UMUSEKE.
Muhazi United WFC: Ni ikipe yashegeshwe no kubura amikoro ndetse bituma itakaza abakinnyi benshi bayifashije umwaka ushize kuko mu bari bahari, yasigaranye barindwi gusa, yinjiza abandi 10 bashya ndetse inazamura bake mu kipe yabo y’abato.
N’ubwo bimeze gutyo ariko, ubuyobozi bwayo buvuga ko intego ibazanye muri uyu mwaka w’imikino, ari ukuza mu myanya myiza izatuma itamanuka ariko kandi no guhatanira kwegukana igikombe cy’Amahoro kuko ubushize babonye ko bishoboka nyuma yo gutsindirwa muri ½.
Bugesera WFC: Ni ikipe ikunda gukora ibintu byayo bucece ariko UMUSEKE wageragaje gutungamo itoroshi, umenya abashya bazagaragara mu mwambaro wayo.
Iyi kipe yinjije abarimo Abayisenga Divine, Iradukunda Marie Josée, Maniraguha Louise, Mukandayisenga Drocella, Mushimiyimana Thacienne, Muyisengirumva Feza, Ngabire Djamila, Tuyishime Aime, Uwajeneza Joselyne na Vuguziga Claudine.
Mbere yo kwinjiza abashya arikp, yari yabanje gutandukana n’abarimo Mukarwego Marie Claire, Mutangampundu Denise, Mutetiwabo Regine, Nikuze Denise na Rumuli Adolphine.
Ni ikipe ifite intego yo kuza mu makipe atandatu ya mbere, cyane ko aya ahembwa n’Ishyirahamwe ry’Umupira w’Amaguru mu Rwanda [FERWAFA].
Forever Girls WFC: Ni ikipe yatandukanye n’abakinnyi bayo benshi bari bayirimo mu mwaka ushize w’imikino 2025-26 ndetse inatakaza umutoza wayo, Habimana Nuru wagiye muri Rambura WFC, wasimbuwe na Iragena Oscarie.
Yinjije kandi abakinnyi bato n’abandi barimo abo yakuye muri Repubulika Iharanira Demokarasiya Congo [RDC] n’abandi b’imbere mu Gihugu.
Amakuru UMUSEKE wamenye, ni uko ifite intego yo kuzaza mu makipe meza ikarwanira kutamanuka kugira ngo mu mwaka utaha izabashe kongera kwisuganya neza.
Indahangarwa WFC: Ni ikipe yatandukanye n’abakinnyi batanu, yinjiza babiri mu gihe yahisemo kuzamura abakinnyi bane mu kipe y’abato.
Aganira na UMUSEKE, umuyobozi wayo, Kamali François, yabwiye UMUSEKE ko intego bafite uyu mwaka, ari ukwegukana kimwe mu bikombe yaba icya Shampiyona cyangwa icy’Amahoro.
Amakipe yandi arimo APR WFC, Gakenke Ladies WFC, Police WFC na Indahangarwa WFC, akomeje kwisuganya ngo azabe mu zizaba zihataniye ibikombe by’amarushanwa akinirwa mu Rwanda.
Imikino y’umunsi wa mbere wa Rwanda Women’s Super League 2026-27.
Tariki 14 Ugushyingo 2026 hateganyiwe imikino itatu yose izatangira Saa Cyenda z’amanywa. Rambura WFC izakira APR WFC, Muhazi United WFC izasura Indahangarwa WFC mu gihe Rayon Sports izaba yakiriye Gakenke Ladies WFC.
Ku wa 15 Ugushyingo 2026, hateganyijwe indi mikino itatu izatangira Saa Cyenda z’amanywa. Bugesera WFC izakira Macuba WFC, Kamonyi WFC izaba yakiriye Inyemera WFC mu gihe Police WFC izaba yakiriye Forever Girls WFC.
UMUSEKE.RW
