Minisitiri w’Ububanyi n’Amahanga n’Ubutwererane, Olivier Nduhungirehe, ari kumwe na Minisitiri w’Ubuzima, Dr. Sabin Nsanzimana na Minisitiri w’Ubucuruzi n’Inganda, Antoine Kajangwe, bagiranye ibiganiro n’abahagarariye ibihugu n’imiryango mpuzamahanga ku ngamba Guverinoma y’u Rwanda yafashe mu kurwanya inzoga zitujuje ubuziranenge zizwi nk’ibyuma’.
Ni inama yabaye ku wa Gatanu tariki ya 21 Kanama 2026.
Minisiteri y’Ububanyi n’Amahanga yatangaje ko iyi nama yasobanuriraga abahagarariye ibihugu n’imiryango mpuzamahanga ingamba za Guverinoma y’u Rwanda zo guhangana n’ibinyobwa bisindisha bitemewe, ndetse n’ingamba zo kubaka umuryango ushoboye.
Isobanura ko kandi iyi nama yabaye umwanya wo kuganira n’abafatanyabikorwa bahagarariye ibihugu n’imiryango mpuzamahanga, gusobanura uburyo u Rwanda rukemuramo iki kibazo no kugaragaza ibikorwa biri gukorwa mu guhangana n’ingaruka ziterwa n’ibinyobwa bisindisha bitemewe.
Iti “Guverinoma y’u Rwanda ikomeje gushyira imbere kurengera ubuzima rusange, kongera ubushobozi bw’umuryango no gukorana n’abafatanyabikorwa mu gushakira hamwe ibisubizo birengera abaturage.”
Kuva mu ntangiriro za Kanama 2026, u Rwanda rwafashe ingambo zo gukura ku isoko inzoga zitujuje ubuziranenge, aho inganda z’imbere mu Gihugu zirenga 140 zafunzwe zikamburwa n’uburenganzira bwo gukora, ibyo zakoraga bigakurwa ku isoko bikamenwa.
Uretse izo nganda, ubwoko bw’inzoga burenga 50 bwaturukaga hanze y’u Rwanda nabwo bwaciwe ku isoko ry’u Rwanda, ubwari mu maduka buramenwa.
Muri ibi bikorwa, abantu 80, barimo bamwe mu banyenganda n’abayobozi batawe muri yombi.
Izi ngamba zafashwe nyuma y’uko abantu 50 bapfuye, abarenga 100 bagahuma n’abandi bakagirwa imbata n’izo nzoga.
MUGIRANEZA THIERRY/ UMUSEKE.RW
