Muri Repubulika Iharanira Demokarasi ya Congo, abaturage bateye itsinda ry’abakozi b’inzobere bari mu gikorwa cyo gushyingura umuntu wishwe n’indwara ya Ebola, bariruka basiga umurambo.
Ibi byabaye muri Kivu y’Amajyepfo mu Mujyi wa Kitana uri muri kilometero 13 uvuye mu Mujyi wa Bukavu.
Reuters yatangaje ko Minisiteri y’Ubuzima muri Congo yabwiye iki kinyamakuru ko ubwo abakozi bazobereye mu gushyingura abishwe na Ebola bari mu gikorwa cyo gushyingura uwishwe n’icyo cyorezi batewe n’itsinda ry’abaturage, abandi bayabangira ingata bariruka basiga umurambo.
Uwo murambo wajyanwe n’abaturage, ibyazamuye ubwoba bw’uko Ebola yahakwirakwira dore ko inzego z’ubuzima zivuga ko ikinyabuzima cyishwe na Ebola cyanduza abandi bagikoraho badafite ubwirinzi.
Nubwo icyatumye abo baturage batera abashyinguraga uwishwe na Ebola kitahise kimenyekana, harakekwa ko batemeraga ko umuntu wabo ariyo yamwishe bityo bakwiriye kumwishyingurira.
Bamwe mu baturage bo muri Repubulika Iharanira Demokarasi ya Congo bavuga ko nta Ebola ihari ahubwo ari igihuha cyazanwe n’abanyamahanga ngo babatera ubwoba.
Bamwe mu barwayi batoroka ibitaro cyangwa bakabyangiza bagamije kwisubirira mu mirimo n’imiryango yabo.
Nubwo bimeze bityo, Minisiteri y’Ubuzima yaho ivuga ko kuva ku wa 15 Gicurasi 2026, ubwo icyorezo cya Ebola cyo mu bwoko bwa Bundibugyo cyagaragaraga, abantu 363 ari bo byemejwe ko barwaye mu barenga 1000 bayiketsweho, 62 bahitanwa nayo.
Iyi Ebola yiganje cyane mu Ntara ya Ituri ahabonetse abarwayi benshi. Yambutse n’imipaka igera muri Uganda.
MUGIRANEZA THIERRY/ UMUSEKE.RW
