Umunyarwanda, Niyonkuru Florence ukina imikino ngororamubiri yo gusiganwa ku maguro, akomeje kwandika amateka, aho yongeye guhesha u Rwanda Umudali w’Umuringa mu mikino ya Shampiyona y’Isi ya 2026.
Iyi mikino yiswe ‘World Athletics Road Running Championships’, itegurwa n’Ishyirahamwe ry’Imikino yo gusiganwa ku maguru ku Isi [World Athletics] iri kubera mu Mujyi wa Copenhagen muri Danemark.
Ku Cyumweru, tariki ya 20 Nzeri 2026, abari muri iri rushanwa mu cyiciro cy’abagore, bakoze intera y’ibilometero 21 bingana na ½ cya Marato yose. Niyonkuru Florence uhagarariye u Rwanda muri iri rushanwa, yitwaye neza atahana umudari w’umuringa.
Uretse kuba Niyonkuru yatahanye umudari, hari n’abandi Banyarwanda bahagarariye Igihugu muri iri rushanwa, barimo Emeline Imanizabayo na Ibishatse Angelique.
Florence yabigezeho akoresheje isaha imwe n’iminota itandatu n’amasegonda atanu. Yasizwe na Agnes Jebet wabaye uwa mbere na Veronica Loleo wabaye uwa kabiri, bombi bakomoka muri Kenya.
Uyu mukobwa wahesheje u Rwanda muri iyi Shampiyona y’Isi, anaherutse kuba uwa gatatu mu mikino ya Commonwealh aho yegukanye umudali w’Umuringa ubwo yasiganwaga ku ntera ya metero 10,000. Wari umudari wa mbere u Rwanda rubashije kwegukana muri iri rushanwa.
Niyonkuru w’imyaka 25, anaherutse kwandika amateka akomeye ubwo yegukanaga umudari wa Zahabu mu gusiganwa ku ntera ya metero 10,000 muri TCS World 10k Bengaluru’ yabereye mu gihugu cy’u Buhinde.
UMUSEKE.RW
