Abaturage 1000 bo mu Karere ka Bugesera mu Ntara y’i Burasirazuba, bahawe Ubwisungane mu Kwivuza na Ramjaane Foundation yashinzwe na Ramjaane Joshua.
Joshua wamenyekanye ubwo yari umunyarwenya mu Rwanda, yatanze Miliyoni 5 Frw yo kugurira abaturage 1000 Ubwisungane mu Kwivuza.
Aba baturage bahawe ubu Bwisungane, ni abo mu Mirenge ya Kamabuye na Ngeruka.
Iki gikorwa cyabaye kuri uyu wa Gatanu, tariki ya 17 Nyakanga 2026.
Ni umuhango warimo Ramjaane wari kumwe na Adam bavanye muri Leta Zunze Ubumwe za Amerika, babanje guhugura abashinzwe Imbonezamirire mu miryango.
Nyuma y’igikorwa cyo guha aba baturage Ubwisungane mu Kwivuza, habaye Irushanwa rya Ruhago ryari rigamije kurwanya Ibiyobyabwenge.
Ryabereye ku kibuga cya GS Nyakayaga cyo mu Murenge wa Kamabuye, rihuza Umurenge wa Kamabuye wari uhagarariwe n’Akagari ka Kampeka n’uwa Ngeruka wari uhagarariwe n’Akagari ka Murama.
Ramjaane Joshua Niyoyita, yakiniye ikipe yari ihagarariye Akagari ka Murama yo mu Murenge wa Ngeruka mu gihe Adam yakiniye iy’Akagari ka Kampeka mu Murenge wa Kamabuye.
Iminota 90 yarangiye amakipe yombi agabanye amanota ku bitego 2-2 ariko Kamabuye yegukana intsinzi kuri penaliti 3-1.
Nyuma y’iri rushanwa, ikipe ya mbere yahembwe ibihumbi 100 Frw mu gihe iya kabiri yahembwe ibihumbi 50 Frw.
Buri Murenge wahawe Ubwisungane mu Kwivuza ku Bantu 500 bungana na Miliyoni 2.5 Frw.
UMUSEKE.RW
