Abanduye icyorezo cya Ebola yo mu bwoko bwa Bundibugyo muri Repubulika Iharanira Demokarasi ya Congo (RDC) bageze ku bantu 8,067, mu gihe abamaze guhitanwa n’iki cyorezo ari 3,901.
Imibare yatangajwe n’Ikigo cy’Igihugu cy’Ubuzima Rusange (INSP) ku wa Mbere tariki 28 Nzeri 2026, igaragaza ko iki cyorezo cyageze mu Ntara zirindwi za Congo zirimo; Ituri, Kivu y’Amajyaruguru, Haut-Uélé, Tshopo, Kivu y’Amajyepfo, Sud-Ubangi na Bas-Uélé.
Mu bantu 8,067 barwaye Ebola muri Congo kuva muri Gicurasi 2026, abagera ku 3,901 barapfuye, ibituma iki cyorezo cya Ebola cyo mu bwoko bwa Bundibugyo kimaze kuba icyorezo cya Ebola cyahitanye abantu benshi kurusha ibindi byabaye muri RDC.
Abana bari munsi y’imyaka itanu ni bamwe mu bibasiwe cyane n’iki cyorezo, aho umubare w’abahitanwa na cyo bari muri iyo myaka urenga 60%.
Ishami ry’Umuryango w’Abibumbye ryita ku Buzima (OMS) riheruka gutangaza ko iki cyorezo kigenda kigabanuka by’umwihariko nko mu Ntara ya Ituri aho cyahereye gusa mu Ntara ya Kivu y’Amajyaruguru umubare w’abandura uguma kwiyongera.
Ebola yo mu bwoko bwa Bundibugyo ikomeje kwibasira RDC kuva muri Gicurasi 2026. Kugeza ubu, nta rukingo cyangwa umuti byihariye byemejwe kuri ubu bwoko bw’iyi ndwara.
Ku wa 21 Kanama 2026, i Kinshasa hakiriwe icyiciro cya mbere cy’inkingo 16,520 mu nkingo 50,120 iki Gihugu kizakira mu rwego rwo guhangana na Ebola.
Ishami ry’Umuryango w’Abibumbye ryita ku Buzima (OMS) ryatangaje ko izi nkingo zo mu bwoko bwa Ervebo zishobora kwifashishwa mu guhangana n’iki cyorezo, hashingiwe ku kuba zarigeze gukoreshwa mu kurwanya Ebola yo mu bwoko bwa Zaire yishe abarenga 11,000 mu Burengerazuba bwa Afurika hagati ya 2013 na 2016.
Ikigo Nyafurika gishinzwe Kurwanya no Kwirinda Indwara (Africa CDC) cyatangaje ko hamaze gukusanywa hafi miliyari 2.9 z’amadolari yo guhangana n’iki cyorezo. Muri ayo mafaranga, Leta Zunze Ubumwe za Amerika zatanzemo miliyoni 886 z’amadolari, naho Umuryango w’Ubumwe bw’u Burayi utanga miliyoni 500 z’amayero, akaba azifashishwa mu gushaka umuti n’inkingo.
MUGIRANEZA THIERRY / UMUSEKE.RW
