Umuyobozi Mukuru w’Ikigo Nyafurika gishinzwe kurwanya no gukumira indwara (Africa CDC), Dr. Jean Kaseya, yasabye ko hakorwa iperereza n’ubucukumbuzi byimbitse ku irengero ritazwi ry’amafaranga arenga miliyoni 700 z’Amadolari ya Amerika yari yarakusanyijwe ngo yifashishwe mu guhangana n’icyorezo cya Ebola muri Repubulika Iharanira Demokarasi ya Congo (RDC).
Mu kiganiro n’abanyamakuru cyabereye i Kinshasa ku wa 14 Ukwakira 2026, Kaseya yavuze ko abaterankunga batangaje ko batanze hafi miliyoni 962 z’amadolari ku bigo n’imiryango ishinzwe gushyira mu bikorwa ingamba zo kurwanya Ebola, ariko amakuru y’imikoreshereze y’amafaranga ubuyobozi bwa Congo bwashoboye kubona akagaragaza ko hakiriwe hafi miliyoni 220 z’amadolari gusa.
Uyu muyobozi wa Africa CDC yasobanuye ko nta makuru asobanutse agaragaza aho izindi miliyoni zirenga 700 z’Amadolari ya Amerika zagiye.
Kaseya yasobanuye ko ayo mafaranga atahawe Guverinoma ya Congo mu buryo butaziguye, ahubwo ko yanyujijwe mu bigo n’imiryango byari bishinzwe gushyira mu bikorwa ibikorwa byo guhangana n’icyorezo.
Ati “Aya mafaranga ntiyashyikirijwe Guverinoma ya RDC.”
Yagaragaje ko iki kibazo kibangamiye ubushobozi bwa Congo bwo guhuza ibikorwa byo kurwanya Ebola, kuko ubuyobozi budashobora kumenya neza umutungo uhari, uko ukoreshwa n’ibyo umaze kugeraho.
Ati “RDC ni yo iyoboye iki gikorwa cyo guhangana n’icyorezo. Buri mufatanyabikorwa agomba kubaha ubwo buyobozi kandi akabazwa ibikorwa bye n’imikoreshereze y’amafaranga ahabwa.”
Ebola muri Congo ikomeje gukaza umurego. Inzego z’ubuzima zaho zatangaje ko iki cyorezo cyujuje amezi atanu kica benshi cyageze mu Ntara ya Nord-Ubangi ihana imbibi na Repubulika ya Centrafrique, iba iya munani kigezemo.
Imibare yatangajwe n’inzego za Leta ya Congo ku wa 13 Ukwakira 2026 ,igaragaza ko abantu barenga 9, 100 bari bamaze kwandura Ebola kuva rwagati muri Gicurasi 2026, mu gihe 4, 381 bari bamaze guhitanwa na yo.
MUGIRANEZA THIERRY/ UMUSEKE.RW
