Gen. Christian Tshiwewe, wabaye Umugaba Mukuru w’ingabo za RDC, yagejejwe imbere y’urukiko kuri uyu wa Kane, mu byo yashinjwe harimo gutunga intwaro zo gukuraho ubutegetsi bwa Tshisekedi.
Gen. Tshiwewe yabaye umujyanama wa Perezida Félix Tshisekedi mu bya gisirikare, umwanya yagiyeho mu 2024 avuye ku w’Umugaba Mukuru w’ingabo.
Uyu musirikare mukuru yatawe muri yombi muri Nyakanga 2025 kubera gukekwaho gushaka guhirika ubutegetsi bwa Perezida Félix Tshisekedi.
Mu rubanza rwo ku wa 4 Kamena 2026, Tshiwewe n’abandi bofisiye icyenda bashinjwe ibyaha birimo kugambanira igihugu, gucura umugambi mubisha no gutunga intwaro mu buryo bunyuranyije n’amategeko.
Ubushinjacyaha bwa Gisirikare bwa RDC bwabwiye Urukiko rwa Gisirikare rwa Kinshasa ko kuva mu 2020 kugeza muri Nyakanga 2025, Gen. Tshiwewe n’abo bareganwa bateguye umugambi wo gukuraho ubutegetsi bwa RDC.
Bwagaragaje ko tariki ya 9 Nyakanga 2025, mu rugo rwa Gen. Tshiwewe ruherereye muri Komini Gombe i Kinshasa, hafatiwe intwaro zirimo 12 za RPG-7, enye za AK-47, esheshatu za PKM n’amasasu atatu ya PKM.
Ubushinjacyaha bwasobanuye ko hafatiwe ibisasu 46 bya roketi za ’69 40mm’, amasasu 4,322 ya ‘7.62x53mm’, isasu rimwe rya ‘7.62x39mm’ rikoreshwa na AK-47, roketi 18 za 40mm, na grenade enye za ‘40mm Kastor’.
Izo ntwaro zose, Ubushinjacyaha bwa gisirikare bwasobanuye ko Gen. Tshiwewe yazitunze n’amasasu atabifitiye uburenganzira.
Abandi bareganwa na Gen. Tshiwewe barimo Gen. John Numbi, Gen Maj Maurice Nyembo, Brig Gen John Ngoy wa Kabila, Brig Gen John Sangwa Muhemedi, Col Guy Mukombozi Zahinda, Col Pathy Sangwa Lumbu, Col Christophe Tshibangu n’umusivile Pascal Nyembo Muyumba.
Gen Tshiwewe wari inshuti magara ya Tshisekedi ategerejwe mu rukiko
NDEKEZI JOHNSON / UMUSEKE.RW
