Ikipe ya APR FC yatangiye nabi irushanwa rya CECAFA Kagame Cup 2026, nyuma yo kunyagirwa na Gor Mahia yo muri Kenya ibitego 5-0, mu mukino wo mu Itsinda A wabereye muri Stade Amahoro kuri uyu wa Gatanu tariki ya 24 Nyakanga 2026.
Saa Moya z’umugoroba nibwo abasifuzi barimo Umunya-Sudani Sabri Fadul, yungirijwe na Omer Hamid wo muri Sudani na Eleye Robleh wo muri Djibouti, batangije uyu mukino abafana b’Ikipe y’Ingabo bari bategereje cyane ngo barebe ikipe yabo dore ko bayiherukaga mu mwaka w’imikino washize.
Umutoza wa APR FC, Taleb Abderrahim, yari yabanje mu kibuga abakinnyi barimo; Siluane Ernan Alberto, Nshimiyimana Yunusu, Ishimwe Christian, Byiringiro Jean Gilbert, Amani Kuodiakan Michel Breygeneve, Madou Zon, Dauda Yussif Seidu, Djibrill Ouattara Cheick, Ssekiganda Ronald, Dao Raouf Memel na Togui Mel William.
Ku ruhande rwa Gor Mahia, umutoza Charles Kwablan Akonnor yari yahisemo kubanza mu kibuga; Bryne Omondi Odhiambo, Mike Evans Kibwage, Daniel Sakari Macheso, Siraji Mohamed Siraji, Frank Onyango Odhiambo, Enock Momanyi Machaka, Alpha Chris Onyango, Jackson Dwang Mulla, Ariste Patrick Ekandjoum Essombe, Paul Okoth Odhiambo na David Okoth Odhiambo.
APR FC ni yo yatangiye umukino neza, yiharira umupira kandi isatira cyane izamu rya Gor Mahia mu minota ya mbere, ishaka gufungura amazamu hakiri kare. Gusa uko iminota yagendaga, Gor Mahia yatangiye kwigarurira umukino no gushyira igitutu ku bwugarizi bwa APR FC.
Ku munota wa 32, Mike Evans Kibwage yafunguye amazamu atsindira Gor Mahia igitego cya mbere cyavuye kuri koroneri. Nyuma y’iminota mike, Ariste Patrick Ekandjoum Essombe yatsindiye iyi kipe yo muri Kenya igitego cya kabiri ubwo yateraga ishoti riremereye ari inyuma y’urubuga rw’amahina rihita rijya mu izamu.
Igice cya mbere cyarangiye Gor Mahia iyoboye umukino n’ibitego 2-0.
APR FC yagarutse mu gice cya kabiri ishaka kugabanya ikinyuranyo, ariko Gor Mahia yakomeje kuyirusha imbaraga.
Ku munota wa 63, Paul Okoth Odhiambo yatsinze igitego cya gatatu cya Gor Mahia, ibintu birushaho kuba bibi ku ruhande rwa APR FC.
Gor Mahia yakomeje kwiharira umukino, maze ku munota wa 79 Sariff Sabuni Sirengo atsinda igitego cya kane, mbere y’uko Ebenezer Assifuah ashyiraho akadomo ku ntsinzi y’iyi kipe yo muri Kenya, atsinda igitego cya gatanu ku munota wa 87.
Mbere y’umukino wa APR FC na Gor Mahia, Vipers SC yo muri Uganda yari yatangiye neza irushanwa, itsinda Garde Républicaine FC yo muri Djibouti ibitego 3-0.
Ibi bivuze ko APR FC itangiye iri rushanwa iri ku mwanya wa nyuma mu Itsinda A, n’ubusa bw’amanota n’umwenda w’ibitego bitanu.
Umukino ukurikira APR FC izakina na Garde Républicaine FC yo muri Djibouti, ku wa Mbere, tariki ya 27 Nyakanga 2027, muri Stade Amahoro.
CECAFA Kagame Cup 2026 yitabiriwe n’amakipe 12, arimo APR FC na Rayon Sports zihagarariye u Rwanda.
Andi makipe ari muri iri rushanwa ni Vipers SC yo muri Uganda, Gor Mahia na Tusker FC zo muri Kenya, Garde Républicaine FC yo muri Djibouti, Singida Big Stars na Simba SC zo muri Tanzania, Jamus yo muri Sudani y’Epfo, Mogadishu City yo muri Somalia, Al Hilal SC yo muri Sudani na KVZ SC yo muri Zanzibar.
MUGIRANEZA THIERRY/ UMUSEKE.RW
