Hakainde Hichilema, Perezida wa Zambia, yatsinze amatora ya Perezida yabaye muri uku kwezi, nyuma yo kubona amajwi arenga 60%.
Komisiyo y’Amatora ya Zambia (ECZ) yatangaje ibyavuye mu matora nyuma yo kubara no guhuza amajwi yo mu duce 226 twatorewemo.
Hichilema wo mu ishyaka UPND yagize amajwi 2,965,326, angana na 60.49%.
Umukandida bari bahanganye cyane, Brian Mundubile wo mu ishyaka NRPUP, yagize amajwi 1,856,217, angana na 37.87%.
Hichilema yatsinze Mundubile ku kinyuranyo cy’amajwi 1,109,109.
Muri aya matora, abantu 8,786,300 bari barariyandikishije gutora. Amajwi yemewe yabaye 4,902,050, mu gihe 126,566 yateshejwe agaciro. Ubwitabire bw’amatora bwabaye 57.23%.
Abandi bakandida bagize amajwi make. Harry Kalaba wo mu ishyaka Citizens First yagize amajwi 19,070, naho Kelvin Fube Bwalya wo mu ishyaka Zambia Must Prosper agira 17,078.
Iyi ntsinzi iha Hichilema manda ya kabiri y’imyaka itanu.
Amategeko y’amatora ya Zambia ateganya ko umukandida ugize hejuru ya 50% by’amajwi yemewe ahita atangazwa ko yatsinze, bityo ntihakenerwe amatora y’icyiciro cya kabiri.
NDEKEZI JOHNSON / UMUSEKE.RW
