Nyuma yo gusohora urutonde rw’abakinnyi 23 batarimo Mukagatete Emelyne bazifashishwa muri CAF Women’s Champions League CECAFA Qualifiers 2026, Rayon Sports WFC izahagararira u Rwanda, yahisemo kumwongeramo igitaraganya.
Ku wa Gatatu, tariki ya 12 Kanama 2026, Rayon Sports WFC yatangaje abakinnyi 23 izifashisha mu mikino Nyafurika ihuza amakipe y’Abagore yitwaye neza mu Karere ka Afurika y’i Burasirazuba no Hagati [CAF Women Champions League CECAFA Qualifiers 2026], izabera i Kigali tariki ya 21-31 Kanama 2026.
Ni urutonde rutariho bamwe mu beza iyi kipe yo mu Nzove isanzwe igenderaho. Muri aba, harimo Mukagatete Emelyne uzwi ku izina rya ‘Luvumbu’, utari washyizwe muri aba bakinnyi.
Amakuru yizewe UMUSEKE wamenye, ni uko Luvumbu yamaze kongerwa mu bakinnyi 23 Murera izifashisha muri iri rushanwa.
Ni amakuru kandi yemejwe na Uwimana Jeanine uyobora Rayon Sports WFC ubwo yari abajijwe niba koko uyu mukinnyi yongerewe mu bo bazifashisha.
Yagize ati “Yego.”
Uyu mukinnyi ni ubu ari kumwe na bagenzi be mu mwiherero uri kubera kuri Hoteli ya FERWAFA iherereye i Remera.
Rayon Sports WFC iri mu itsinda A na Jei Joint Stars yo muri Sudani y’Epfo, Denden FC yo muri Éritrea na Mafunzo SC yo muri Zanzibar.
UMUSEKE.RW
