Myugariro wo hagati, Uwimbabazi Immaculée, yamaze gutandukana na Rayon Sports WFC yebereye kapiteni mu mwaka ushize 2025-26.
Gutandukana kw’uyu mukinnyi na Murera y’Abagore, kwamenyekanye ku manywa yo kuri uyu wa Kane, tariki ya 13 Kanama 2026.
Amakuru yizewe UMUSEKE wamenye, avuga ko Uwimbabazi yanditse mu rubuga rwa WhatsApp rw’abakinnyi, abasezeraho abamenyesha ko atakiri umukinnyi wayo, abifuriza kuzahirwa mu irushanwa rya CECAFA y’Abagore iteganyijwe kubera i Kigali tariki ya 21-31 Kanama 2026.
Ikirenze kuri ibyo, Immaculée yamaze guhabwa ibaruwa imurekura [Release letter] yemeza ko ikipe yamwifuza yamuganiriza.
Aganira na UMUSEKE, Uwimbabazi yahamije ko atakiri umukinnyi w’iyi kipe yo mu Nzove yari amazemo imyaka itatu.
Ati “Yego twatandukanye.”
Ibi byabaye nyuma y’uko uyu myugariro atashyizwe mu bakinnyi 23 Rwaka Claude azifashisha muri iri rushanwa mpuzamahanga rizabera i Kigali nyamara yari mu bagenderwagaho ubwo iyi kipe yageraga ku mukino wa nyuma wa CAF Women’s Champions League CECAFA Qualifiers 2025, ubwo iyi kipe yageraga ku mukino wa nyuma igatsindwa igitego 1-0 na JKT Queens yo muri Tanzania.
Mu mwaka ushize w’imikino 2025-26, ntabwo Uwimbabazi yabonye umwanya uhagije wo gukina, ndetse byamuviriyemo no gutakaza igitambaro cy’ubukapiteni.
Mbere yo kujya muri Rayon Sports WFC, uyu myugariro yakiniye AS Kigali WFC. Ndetse ni umukinnyi w’ikipe y’Igihugu y’u Rwanda y’Abagore [She-Amavubi].
UMUSEKE.RW
