Nyuma yo kwitwara neza mu Gikombe cy’Isi 2022 cyabereye muri Qatar, ikipe y’igihugu ya Maroc yongeye gukorera amateka muri iri rushanwa riri kubera muri Leta Zunze Ubumwe za Amerika nyuma yo gusezerera u Buholande.
Mu rukerera rwo kuri uyu wa kabiri, tariki ya 30 Kamena 2026, ni bwo ikipe y’Igihugu ya Maroc yakatishije itike ya 1/8 mu Gikombe cy’Isi 2026 kiri kubera muri Leta Zunze Ubumwe za Amerika, Mexique na Canada.
Iyi kipe iri mu zihagarariye Umugabane wa Afurika, yabigezeho nyuma yo gutsinda u Buholande kuri penaliti 3-2 nyuma y’uko amakipe yombi yari yanganyije igitego 1-1 mu minota 120.
Iyi ntsinzi y’abanya-Maroc, yatumye iba ikipe ihagarariye Umugabane wa Afurika yabashije guca agahigo ko kurenga imikino y’amatsinda inshuro ebyiri zikurikirana mu Gikombe cy’Isi nyuma yo kubikora mu cyebereye muri Qatar muri 2022.
Ubusatirizi bw’ikipe y’Igihugu ya Maroc bumaze kwinjiza ibitego birindwi mu mikino imaze gukina mu irushanwa ry’uyu mwaka.
Yabaye ikipe ya mbere ihagarariye Umugabane wa Afurika, yabashije kubona igitego cyo kunganya cyatsinzwe mu gice cya kabiri mu mikino yo gukuranamo [Knockout].
Maroc yabaye indi kipe y’Igihugu ikomoka ku Mugabane wa Afurika imaze gukina imikino myinshi mu Gikombe cy’Isi [27] nyuma ya Cameroun. Igitego cyo kwishyura u Buholande, cyatsinzwe na Issop Diop mu minota ya nyuma y’umukino.
Umunyezamu w’ikipe y’igihugu ya Maroc, Yassine Bounou yongeye gushyiraho akandi gahigo nyuma yo gukoramo penaliti imwe y’u Bulonde.
Yabikoze mu Gikombe cy’Isi 2022 cyabereye muri Qatar ubwo yakuragamo ebyiri za Espagne, yongera gukoramo ebyiri mu 2025 ubwo yakuragamo ebyiri za Nigeri mu Gikombe cya Afurika.
UMUSEKE.RW
