Umuhanzi Israel Mbonyi yongewe mu bazataramira abakunzi b’umuziki wo kuramya no guhimbaza Imana mu gitaramo “Umuryango Mwiza Live Concert – Season III”, cyateguwe na Family of Singers Choir.
Iki gitaramo giteganyijwe ku wa 20 Nzeri 2026, muri Kigali Conference & Exhibition Village (KCEV) ahazwi nka Camp Kigali.
Israel Mbonyi azifatanya na Family of Singers Choir ndetse na Shalom Choir, mu gitaramo kigamije guhuza abakristo n’imiryango binyuze mu muziki wo kuramya no guhimbaza Imana.
“Umuryango Mwiza Live Concert – Season III” ni igitaramo cya gatatu mu ruhererekane rwa gahunda ya Family of Singers Choir, ikorera umurimo w’Imana muri EPR Kiyovu.
Abategura iki gitaramo bavuga ko kigamije gukomeza kubaka imiryango ishingiye ku Mana, binyuze mu kuramya, guhimbaza no kugeza ku bantu ubutumwa bw’Ijambo ry’Imana hakoreshejwe umuziki.
Iki gitaramo gifite insanganyamatsiko igira iti: “Ariko jye n’inzu yanjye, tuzakorera Uwiteka.” — Yosuwa 24:15.
Amatike y’iki gitaramo ari kugurwa kuri internet, hifashishijwe urubuga rwa www.familyofsingerschoir.rw, cyangwa hakagurwa amatike asanzwe.
Abifuza ibindi bisobanuro cyangwa ubufasha mu kugura itike bashobora guhamagara kuri 078 888 0901.
NDEKEZI JOHNSON / UMUSEKE.RW
