Misiri na Congo bikomeje ibiganiro bigana imbere mu mikoranire igamije kuzamura ubunyamwuga bw’ingabo za Congo, FARDC.
Ibiganiro hagati ya Repubulika Iharanira Demokarasi ya Congo na Misiri byibanze ku hantu henshi hari amahirwe yo gufatanya mu bya gisirikare, harimo guhugura imitwe y’ingabo yashinzwe, kongera ubushobozi bw’abasirikare ba Congo, FARDC, kuvugurura ibikorwa remezo by’amashuri ya gisirikare, ndetse no gusangira ubumenyi mu bikorwa bya “engineering” mu bya gisirikare, n’amahugurwa.
Uruhande rwa Misiri rugaragaza ubushake bwo gushyigikira Kinshasa mu gushyira mu bikorwa iyi gahunda igamije kwihutisha iterambere ry’ubunyamwuga bw’ingabo za Congo.
Muri ibi biganiro byabereye i Cairo, Minisitiri w’Intebe wungirije wa Congo ushinzwe ingabo z’igihugu n’abahoze ku rugerero, Guy Kabombo Muadiamvita, yasuye imva ishyinguyemo abasirikare baguye mu kazi, anashyira indabo ku mva y’umusirikare utazwi, ahantu hakomeye cyane ku ngabo za Misiri.
Itsinda rya Congo ryasuye inyubako ikorerwamo ibikorwa bitandukanye n’ingabo za Misiri banerekwa ibikorsho bitandukanye bikorwa n’abasirikare.
Minisiteri y’Ingabo ya Congo, ivuga ko Guy Kabombo kuva ku ya 8 – 11 Nyakanga 2026, yasuye Minisiri mu rwego rwo kwihutisha imikorere hagati y’icyo gihugu na Congo mu bijyanye no kuzamura urwego rwa FARDC mu mikorere ya kinyamwuga.
Ahandi yasuye uretse hari twavuze, ni ku Ishuri Rikuru rya Gisirikare rya Misiri, rizuhutisha ubumenyi mu bya gisirikare kuri ba Ofisiye ba FARDC.
Guy Kabombo muri uru ruzinduko yari aherekejwe n’itsinda rinini ry’abasirikare bakuru, barimo abajenerali bo mu mashuri atanga amasomo ya gisirikare ku ngabo za FARDC.
Yagiranye ibiganiro na mugenzi we wa Misiri, Lt. Gen Ashraf Salem Zaher, aho yamugaragarije ahantu hane h’ingenzi Congo yifuza gushingiraho mu bufatanye bwa gisirikare. Mu byo harimo kubona ubumenyi bukenewe, ndetse no kunoza imikorere y’igisirikare mu bikorwa byazo.
Guy Kabombo n’abari bamuherekeje basuye ishuri rigezweho mu bya gisirikare rya Misiri kugira ngo binjire mu miterere yaryo, bareba ibikorwa remezo rifite, n’imtitozo ihambaye ritanga.
Kuri Congo ngo ibyo babonye bishobora kuba intangarugero kuri bo muri gahunda bafite yo kuvugurura ibigo by’amahugurwa bya FARDC.
Minisitiri w’Intebe wa Congo, Madamu Judith SUMINWA Tuluka, ni we uyoboye ubu butumwa bw’intumwa za Congo mu Misiri, mu rwego rwo gushaka umufatanyabikorwa wa nyawe, hagamijwe kuzamura ubunyamwuga bw’ingabo za Congo.
Hari hashize igihe gito Perezida Felix Antoine Tshisekedi asuye igihugu cya Misiri.
UMUSEKE.RW
