Ikigo cy’ubukerarugendo bushingiye ku muco, Red Rocks, giherereye mu Murenge wa Nkotsi, Akarere ka Musanze, cyateguye iserukiramuco rizahuza abaturuka mu bihugu bitandukanye, rigamije kugaragaza uko umurage w’umuco ushobora gukoreshwa mu guteza imbere urubyiruko n’abagore.
Iri serukiramuco ngarukamwaka rigiye kuba ku nshuro ya 14, kuva ku wa 28 Kanama kugeza ku wa 4 Nzeri 2026, mu gihe u Rwanda ruzaba rwitegura umuhango wo Kwita Izina abana b’ingagi uteganyijwe ku wa 4 Nzeri 2026.
Red Rocks ivuga ko iri serukiramuco rizaba umwanya wo kwerekana umuco nyarwanda, guteza imbere ubukerarugendo bushingiye ku murage ndangamuco no gufasha abaturage kubona amahirwe y’akazi n’ubucuruzi.
Mu bikorwa biteganyijwe harimo imurikagurisha ry’ibikorwa by’abaturage, ubukorikori, imbyino n’umurishyo w’ingoma, amafunguro gakondo ndetse n’ibindi bikorwa bigaragaza umuco nyarwanda.
Red Rocks ishaka ko urubyiruko n’abagore baba ku isonga mu bikorwa byo kubungabunga umurage w’umuco no guteza imbere ubukerarugendo.
Bamwe mu baturage bakorana na Red Rocks basanzwe bakora ubukorikori burimo kuboha uduseke, ibirago, imitako n’ibindi bihangano bishingiye ku muco.
Umuyobozi Mukuru wa Red Rocks, Bakunzi Gregoire avuga ko iri serukiramuco ari umwanya wo kubungabunga umurage w’umuco.
Yongeraho ko ubukerarugendo bushingiye ku muco butanga umusaruro mu mibereho y’abaturage no guhanga imirimo.
Bakunzi avuga kandi ko umurage w’umuco udakwiye kugarukira gusa ku kurinda amateka, ahubwo ko ari n’inzira yo guhanga udushya no guteza imbere urubyiruko.
Ati: “Umurage w’umuco wacu uduha kumva no kumenya abo turi bo, ukaba isoko y’ingenzi kandi idasimburwa ushingiye ku bitekerezo bishya n’ubuhanzi. Kubungabunga umurage ni inzira ihoraho yo guhanga udushya.”
Red Rocks ikorana n’abantu 120, barimo abagore 83 n’abagabo 37, bakora ibikorwa bitandukanye by’ubukorikori n’ubugeni.
Biteganyijwe ko iri serukiramuco rizabaha umwanya wo kumurika ibyo bakora, guhura n’abakerarugendo no gushaka amasoko mashya y’ibihangano byabo.
NDEKEZI JOHNSON / UMUSEKE.RW
