Shalom Choir ADEPR Nyarugenge yongerewe ku rutonde rw’abazatarama mu gitaramo Umuryango Mwiza Live Concert – Season 3, gitegurwa na Family of Singers Choir yo muri EPR Paroisse Kiyovu.
Iki gitaramo kizaba ku Cyumweru, tariki ya 20 Nzeri 2026, muri Camp Kigali, aho abakunzi ba muzika ya Gospel bazahurira mu mwuka wo gusangira umunezero, kuramya no gutambutsa ubutumwa bwubaka umuryango.
Byitezwe ko Shalom Choir ADEPR Nyarugenge izongera imbaraga n’ubwiza bw’iki gitaramo, kuko izafatanya na Family of Singers Choir mu gutaramira abazacyitabira.
Abategura iki gitaramo bongeyeho ko hazatangwa ubutumwa bwubaka n’imwe mu ntego nyamukuru z’iki gikorwa, by’umwihariko mu guteza imbere umuco wo gukomeza umuryango binyuze muri muzika ya Gospel.
Amatike yamaze kujya ku isoko
Abifuza kuzitabira Umuryango Mwiza Live Concert – Season 3 bamenyeshwa ko amatike yamaze kujya ku isoko kandi ashobora kugurwa hakiri kare.
Amatike ashobora kugurwa hifashishijwe urubuga rwa Family of Singers Choir, ari rwo www.familyofsingerschoir.rw.
Abategura iki gitaramo barakangurira abazacyitabira kutazategereza umunsi nyirizina, ahubwo bakagura amatike hakiri kare kugira ngo bazabashe kwitabira iki gitaramo.
Biteganyijwe ko imiryango izafungurwa saa cyenda z’amanywa.
Umuryango Mwiza Live Concert – Season 3 izaba ifite insanganyamatsiko ishingiye ku murongo wo muri Yosuwa 24:15, ugira uti: “Ariko jye n’inzu yanjye tuzakorera Uwiteka.”
Iki gitaramo kigamije guteza imbere umuco wo kubana neza, gusangira umunezero no gukomeza imiryango binyuze muri muzika ya Gospel n’ubutumwa bwubaka.
NDEKEZI JOHNSON / UMUSEKE.RW
