Urukiko Rwisumbuye rwa nyarugenge rwasubitse urubanza rwa ISHIMWE Dieudonne ukurikiranyweho gusambanya bamwe mu bakobwa bitabiriye irushanwa rya Miss Rwanda, yateguraga.
Kuri uyu wa Kane, Urukiko rwisumbuye rwa Nyarugenge rwari rwasubukuye uru rubanza ruregwamo Ishimwe Diedonne wamenyekanye nka Prince Kid.
Saa mbiri n’iminota icumi nibwo Prince Kid yagejejwe ku rukiko rwisumbuye rwa Nyarugenge, acungiwe umutekano bikomeye n’abacungagereza.
Umucamanza yatangiye avuga ko uru rubanza rwagombaga kuburanishwa ku wa 15 Ugushyingo 2022 ariko ruza gusubikwa kubera ko Umucamanza yari mu mahugurwa.
Umucamanza yibukije umuburanyi ko urubanza rubera mu muhezo nk’uko byemejwe mu cyemezo cyafashwe n’urukiko ku wa 28 Ukwakira, 2022.
Umucamanza yahise asaba abantu bose gusohoka mu cyumba cy’urukiko n’abacungagereza barimo.
Amakuru UMUSEKE wamenye ni uko Abanyamategeko ba ISHIMWE Dieudonne, ari bo Me Kayijuka Ngabo na Me Emeylne Nyembo batanze inzitizi ko abatangabuhamya bavuze bari kuri Skype ariko bakaba batazi aho baherereye.
Byakekwaga ko bari kuvugira mu Bushinjacyaha Bukuru.
Indi nzitizi, ni iyo kuba Urukiko rwari rwanzuye ko Ubushinjiacyaha butavuga kuko bwamaze kuvuga, ahubwo hakaba hari kumvwa abatangabuhamya gusa.
- Advertisement -
Urukiko rwahise rufata akanya k’iminota 15 rwiherereye ngo rufate icyemezo kuri izo nziztizi, rwanzura ko urubanza rusubitswe ruzasubukurwa ku wa 25 /11 / 2022 saa mbiri za mu gitondo.
Mu kiganiro kigufi yahaye itangazamakuru, Me Emeylne Nyembo yavuze ko bifuza ko abatangabuhamya bazagaragara mu Rukiko kugira ngo abunganira ISHIMWE Dieudonne bababaze ibibazo.
Ishimwe Dieudone akurikiranyweho icyaha cyo gukoresha undi imibonano mpuzabitsina ku gahato. Urubanza rwe rwahawe nimero ya dosiye RP 00653/2022/TGI/NYGE.
Yatawe muri yombi bwa mbere muri Mata 2022 agiye kumara amezi arindwi muri Gereza ya Nyarugenge. Uyu musore w’imyaka 34 afungiye muri Gereza ya Nyarugenge kuva muri Gicurasi, 2022.
Prince Kid yasabiwe gufungwa imyaka 16 – uko mu muhezo byari bimeze
Amafoto: @NKUNDINEZA
JEAN PAUL NKUNDINEZA/UMUSEKE.RW