Uganda: Polisi ivuga ko impanuka y’imodoka yabereye ku muhanda Ntungamo-Mbarara Road ahitwa Itojo yahitanye umuherwe Apollo Nyegamehe, bahimbaga Aponye.
Iyi mpanuka yabaye mu ijoro ryo ku wa Kane, tariki 06/07/2023 ahagana saa tatu z’ijoro (21h00).
Amakuru avuga ko umushoferi wa Apollo wari utwaye Land Cruiser, UBF 300Z yagonze FUSO, UAZ 767D.
Polisi ya Uganda ivuga ko iperereza ry’ibanze rigaragaza ko imodoka ya Apollo yerekezaga mu mujyi wa Kabale, yagonze imodoka ya FUSO yari ihagaze ku ruhande rw’umuhanda yagize ibibazo bya tekinike.
Itangazo rivuga ko Apollo Nyegamehe yahise apfa, umurambo we ujyanwa ku Bitaro bya Itojo.
Abandi bantu babiri bakomeretse bajyanywe mu Bitaro bya Mbarara.
Ikinyamakuru Chimp Report kivuga ko Apollo Nyegamahe bahimbaga Aponye yari umuherwe wabonye amafaranga binyuze mu gucuruza imyaka no kuyitunganya mu nganda.
Chimp Report kivuga ko Apollo yari agiye mu gace akomokamo mu mihango yo gushyingura umwe mu nshuti ze witwa Simeo wapfuye ku wa Gatatu, akaba yari umwe mu bacuruzi bazwi mu gace ka Kabale.
Uyu muhanda wa Mbarara uherutse kugwamo umwe mu ba Pasiteri bari bazwi mu Rwanda, Theogene Niyonshuti bahimbaga “Inzahuke” akaba yari azwi cyane mu bikorwa by’ivugabutumwa mu itorero ADEPR.
- Advertisement -
Na we imodoka yari arimo yakoze impanuka tariki 23/06/2023 ahita apfa.
UMUSEKE.RW