Amakuru y’abantu 11 biciwe ahitwa Kashavu yiriwe ku mbuga nkoranyamba, ni imirambo y’abagabo bivugwa ko bishwe n’umutwe wa M23 wari umaze igihe ugenzura kariya gace.
Abanyamakuru bo muri Congo bavuga ko inyeshyamba za M23 zishe bariya bantu “bivugwa ko ari abasivile” ndetse zitwika inzu mu rusisiro rwa Kashavu, Gurupema ya Bukombo.
Nubwo hari amafoto yakwirakwijwe abishwe bameze nk’abasivile, hari n’andi yakwirakwijwe abishwe bari bafite imbunda zirambitse iruhande rwabo bigakekwa ko ari bamwe bitwa “Wazalendu” Leta ya Congo yahaye intwaro mu byo bita Auto-defense civile.
Umwe mu barokotse kiriya gitero yavuze ko M23 yihoreye nyuma yo gutsindwa na bariya biyita Auto-defense civile.
Iriya mirambo 11 yabonetse kuri iki cyumweru tariki 16 Nyakanga, 2023 mu gace ka Rubona, Gurupema Bukombo, muri Teritwari ya Rutshuru.
Andi makuru avuga ko inyeshyamba za M23 zishobora kuba zitiranyije bariya bantu n’abarwanyi ba FLDR, umutwe w’iterabwoba uvuga ko urwanya Leta y’u Rwanda.
Ku ruhande rw’abashyigikiye umutwe wa M23 bavuga ko bariya bishwe ari abo mu mitwe yitwa Wazalendu ifatanya na FDLR, na Nyatura mu kurwana ku ruhande rw’ingabo za Leta ya Congo mu kurwana na M23.
Bavuga ko bariya bantu bapfuye ari ba Wazalendu bishwe, ariko mu kubafotora ntibagaragaza imbunda bari bafite.
M23 imaze iminsi ihanganye n’imitwe yitwa Wazalendu muri kariya gace bariya bantu biciwemo.
- Advertisement -
Kuri ubu bwicanyi M23 ntabwo irasohora itangazo ihakana cyangwa yemera ibivugwa, ndetse no ku ruhande rwa Congo ntacyo ubuyobozi burabitangazaho.
UMUSEKE.RW