Inyeshyamba za Alliance Fleuve Congo zifatanya na M23 zafashe ahitwa Nyamilima muri Teritwari ya Rutshuru.
Ku gicamunsi cyo ku wa Gatandatu nibwo amashusho yasakaye agaragaza inyeshyamba za M23 zinjira muri Nyamilima abaturage bazikomera amashyi.
Ibitangazamakuru byo muri Congo Kinshasa bivuga ko AFC/M23 yafashe uduce twa Kigunga na Kiseguro, muri teritwari ya Rutshuru.
Ihuriro AFC/M23 amakuru avuga ko ryinjiye hariya Nyamilima ahagana saa 16h03 nta we barwanye kuko ngo ingabo za Leta zahahunze ubwo M23 yafataga ahitwa Vitshumbi.
Bamwe mu rubyiruko rwitwa Wazalendo bari baharinze ngo bahungiye ahitwa Ishasha.
Amakuru avuga ko ihuriro rya AFC/M23 rishaka kwigaruriro Ishasha agace kari ku rubibi rwa Congo na Uganda kugira ngo ribashe kugenzura neza ikiyaga cya Édouard gikora kuri Teritwari ya Rutshuru, Lubero na Beni.
Igisirikare cya Congo cyo kivuga ko kirimo kwisuganya ngo cyisubize uduce twose AFC/M23 yafashe.
Kuri iki Cyumweru, nk’uko byemejwe muri Angola, impande zishyamiranye mu burasirazuba bwa Congo zakabaye zubahiriza agahenge ko guhagarika imirwano kemejwe.
ISESENGURA
- Advertisement -
UMUSEKE.RW