UMUSEKE wabonye kopi y’urubanza rwasomwe tariki 04/10/10, ku ifunga n’ifungurwa ry’agateganyo, rutegeka ko Muhayimana Charles, uregwa iyicarubozo, ubujura bukoresheje kiboko no kwinjira mu makuru abitse muri mudasobwa cyangwa mu rusobe rwa mudasobwa, ndetse na Niyonzima Theodore bahimba KAZUNGU baregwa hamwe, barekurwa bagakurikiranwa badafunze.
Urukiko Rwisumbuye rwa Nyarugenge rwafashe iki cyemezo rugendeye ku kwiregura kwa Muhayimana Charles n’abamwunganira mu mategeko, bagaragaje ko Urukiko rw’ibanze rwa Nyarugenge rwirengagije ko nta mpamvu zikomeye zo kumukurikirana afunzwe, kuko ngo rwashingiye ku mvugo z’uwo bareganwa hamwe witwa NIYONZIMA Theodore alias KAZUNGU wari ukuriye irondo ryagiye gufata MUHIRWA Pierre, wamushinje kuba ari we wakubise MUHIRWA Pierre urushyi mu maso.
Banagaragagarije urukiko ko abandi batangabuhamya, na bo bashinja Muhayimana gukubita Muhirwa Pierre bavuguruzanya aho byabereye, kandi bavuga ko bose babibonye, bamwe bakavuga ko Muhirwa yakubitiwe i Nyabugogo kuri Station SP, abandi bakavuga ko yakubitiwe ku murenge.
Ubshinjacyaha bwo bwasabaga ko Muhayimana Charles na Niyonzima Theodore bahimba Kazungu, bakurikiranwa bafunzwe nk’uko Urukiko rw’Ibanze rwa nyarugenge rwabitegetse kuko hari impamvu zikomeye zituma bakekwaho icyaha.
Nyuma yo gusuzuma ibyo ababuranyi bavuga, Urukiko Rwisumbuye rwa Nyarugenge rwanzuye ko Muhayimana na Niyonzima bafite umwirondoro uzwi, kandi bakaba nta perereza babangamira kuko ryarangiye, ndetse bamaze kuregerwa Urukiko mu mizi kandi ihame ari uko ukurikiranwa akurikiranwa adafunzwe.
Urukiko rwategetse ko bagomba gukurikiranwa badafunzwe, ndetse bagahita barekurwa.
Muhayimana Charles avuga ko atari we wakabaye uregwa kwiba miliyoni 600Frw ko ahubwo yagiye gufata Muhirwa Pierre kuko yamwibye amafaranga arenga ayo, kandi ngo akaba yari yaratorotse ubutabera kuko yashyiriweho mandat d’amener.
Inkuru yabanje
- Advertisement -
Muhayimana Charles umuyobozi w’ishuri Amis des Enfants amaze iminsi atawe muri yombi akekwaho iyicarubozo, ubujura bukoresheje kiboko no kwinjira mu makuru abitse muri mudasobwa cyangwa mu rusobe rwa mudasobwa.
Uyu mugabo areganwa n’uwitwa Niyonzima Theodore bahimba KAZUNGU we ukurikiranyweho iyicarubozo.
Dosiye irimo ikirego cyatanzwe n’uwitwa Muhirwa Pierre ndetse UMUSEKE ufitiye kopi, kivuga ko ibyo Muhayimana na Kazungu baregwa byabaye tariki 20/08/2024.
Kuri iyo tariki mu mujyi wa Kigali ahazwi nka Nyabugogo, niho ngo Muhayimana Charles yakubitiye Muhirwa urushyi mu maso, amufatira amaboko inyuma, amutera ivi mu mugongo amusaba kwemera ko yamwibye miliyoni magana atandatu (Frw 600,000,000).
Ubushinjacyaha buvuga ko Muhayimana yanasabye Muhirwa kumuha password ya telephone ye yiyoherereza Frw 300,000 byo guhemba abamufashije kumufata.
Icyo gihe kandi ngo Muhayimana yatse Muhirwa ku ngufu Frw 40,000 yari afite mu mufuka, ayaha Niyonzima Theodore bahimba KAZUNGU, kugira ngo yemeze ko Muhirwa yibye Muhayimana.
Muhayimana yanasabye Muhirwa kwemera gusinya ko amuhaye imitungo ye.
Urubanza rwasomwe tariki 17/09/2024 Urukiko ruvuga ko Ubushinjacyaha bwavuze ko impamvu zikomeye zituma Muhayimana akekwaho ibyaha akurikiranyweho, bubishingira kuba mu ibazwa rye mu Bugenzacyaha ahakana ibyaha aregwa, ariko akisobanura avuga ko tariki 20/08/2024 abamuha amakuru bamubwiye ko Muhirwa Pierre ari i Nyabugogo kuri Station SP, akajya ku murenge wa Muhima agafata abanyerondo, yamara kumufata akamubaza impamvu ataje kumvikana ko ari umufatanyacyaha na RWABUHUNGU Eugène.
Muhayimana ahakana ko atigeze akora kuri Muhirwa, ariko akemera ko hari Frw 300,000 yakiriye kuri telephone ye, avuye kuri telephone ya Muhirwa.
We akavuga ko ayo mafaranga yayafashe yishyurwa ayo Muhirwa yari amurimo, ko nta yandi mafaranga yamwatse.
Muhayimana mu rukiko yanavuze ko ntaho azi KAZUNGU bareganwa muri dosiye, ndetse ko nta telephone ye agira, ariko Ubushinjacyaha bukavuga ko yivuguruje akavuga ko telephone ya Airtel ikoreshwa na Kazungu bagiye bayivuganiraho.
Muhayimana ngo yanemeye ko muri operation yo gufata Muhirwa yahembye abantu batanu babimufashijemo.
Ubushinjacyaha kandi buvuga ko Niyonzima Theodore bahimba KAZUNGUyakase, asatura ino rya Muhirwa akoresheje icyuma cya Secateur ngo akunde yemere ko yibye, Muhayimana Charles, kandi yandike ko amuhaye imitungo ye.
Icyo gihe ngo Muhayimana Charles yari afatiye amaboko inyuma Muhirwa urega, Niyonzima Theodore bita Kazungu akomeza amubabaza avuga ko agomba na we kumwereka password ya MOMO yibikuriraho Frw 203,000.
Aba bose baregwa bahakanye ibyo bashinjwa, ndetse basaba kurekurwa, cyakora Urukiko rw’Ibanze rwa Nyarugenge rutegeka ko bafungwa by’agateganyo.
UMUSEKE.RW