Ubuyobozi bwa Rwanda Premier League iyobora ikanategura Shampiyona y’u Rwanda [BK Pro League], bwatangaje ko mu gihe Al-Hilal SC yo muri Sudani yaba ibaye iya mbere muri Shampiyona y’uyu mwaka, yahabwa igikombe cy’ishimwe [Honoraly Trophy] aho guhabwa icy’ikipe yegukanye Shampiyona 2025-26.
Kuri uyu wa Gatatu, tariki ya 13 Gicurasi 2026, Al-Hilal SC iraba yakiriye Gasogi United Saa Cyenda z’igicamunsi kuri Kigali Pelé Stadium mu mukino w’umunsi wa 33 wa BK Pro League 2025-26.
Rwanda Premier League yatangaje ko mu gihe iyi kipe yo muri Sudani yaba itsinze cyangwa ikanganya uyu mukino, ihita yegukana Igikombe cya Shampiyona 2025-26.
Uru rwego rwavuze ko Al-Hilal SC ihita ihabwa igikombe cy’ishimwe [Honorary Trophy] n’imidari.
Ni nyuma y’igihe gito n’ubundi RPL itangaje ko izi kipe zo muri Sudani nihagira izaba iya mbere muri Shampiyona, izahabwa igikombe cya Shampiyona [BK Pro League Champions 2025-26].
Uretse iyi kipe yo muri Sudani, RPL yanavuze ko ikipe yo mu Rwanda izaza imbere y’izindi, nayo izahabwa Igikombe cya Shampiyona ikanahabwa Miliyoni 80 Frw agenerwa iyegukanye igikombe.
UMUSEKE.RW
